Utubule ijana tw’urumogi ngo tuba tungana n’irobo ry’urumogi. Ukuyemuye ngo yari yararuranguye ku mafaranga ibihumbi bitanu, ateganya kuvanamo nibura ibihumbi 10 cyangwa arenga.

Yongeraho ko abantu bakundaga kumugurira urwo rumogi ari urubyiruko. Umwe mu bakiriya be ngo niwe warufatanywe ahita yereka inzego z’umutekano uwarumugurishijeho.

Kayumba we ngo yafatanywe inusu y’ikiro cy’urumogi yari yaguze ibihumbi 10 ateganya kuvanamo nibura ibihumbi 30.

Abo bagabo bombi bo mu murenge wa Kabarondo bavuga ko ari ubwambere bari bacuruje urumogi, bakavuga ko barucuruje bashaka ubuzima. Iyo barucuruza bakunguka ngo bari guhita bareka kurucuruza.

Kayumba abisobanura muri aya magambo “Nabigiyemo kubera ubuzima bubi, nanga kwiba mbona nta n’ikindi nakora, iyo mbona igishoro nari gucuruza ikarito, ariko ibihumbi 10 nari mfite nta kintu nari kubikoresha”.

Kayumba afite umugore n’abana babiri. Nubwo yari azi ko gucuruza urumogi ku bana bato ari ukubangiza mu mutwe, avuga ko atakiranuka n’umuntu wamuhera umwana urumogi cyangwa ikindi kiyobyabwenge icyo ari cyo cyose. Ati “uwampera abana urumogi yaba ari kumpemukira kuko yaba ari kubayobya ubwenge”.

Umurenge wa Kabarondo ni wo murenge w’akarere ka Kayonza ukunze gufatirwamo urumogi cyane. Umunyamabanga nshingwabikorwa wa wo, Ntirenganya Gervais, avuga ko hari imikoranire mishya hagati y’abayobozi n’abaturage mu kugaragaza umuntu ufite urumugi cyangwa ikindi kiyobyabwenge muri rusange.

Cyprien M. Ngendahimana