Izo mpfu 32 ziri mu byaha 3519 byakozwe bivuye ku makimbirane yo mu miryango ashingiye ku bwumvikane bucye no ku masambu yabaga yaratinze gucyemurwa. Igihembwe cyari cyabanje ari nacyo cyasozaga umwaka ushize ibyaha byari 3683; bivuze ko habayeho igabanuka rya 4.4%.

Atangariza abanyamakuru ku bijyanye n’iyi raporo, Minisitiri ushinzwe umutekano imbere mu gihugu, Musa Fazil Harelimana, yatangaje ko ibyo bibazo biterwa ahanini n’uko abaturanyi baba batagize icyo bakora kandi basanzwe bazi ko ikibazo gihari.

Yagize ati: “Ibibazo biri mu miryango, ibibazo biri mu bantu bakagombye gutabarana by’ibyanze ariko ukabona nibo noneho bagiye kumarana, izo zisaba byibuza buri wese guhaguruka no kuvuga ngo hariya hantu tuhumva amakimbirane tubakemurire gute ikibazo.

Muri rusange hari impfu twagiye tubona mu miryango zishingiye y’uko abantu bafitanye amakimbirane bakaba baratinze kuyacyemura noneho ayo makimbirane akavamo ubwo bwicanyi”.

Ubujura buciye icyuho cyane cyane mu bice by’icyaro nko kwiba amatungo, gukubita no gukomeretsa mu bantu baziranye, gucuruza no kunywa ibiyobyabwenge biganisha ku rugomo no gufata ku ngufu abana bato n’abakuru nibyo byagaragajwe muri raporo cyane.

Uturere twa Nyabihu twagaragayemo ibyaha 10, Gasabo yagaragayemo ibyaha icyenda, Huye yagaragayemo ibyaha umunani na Muhanga yagaragayemo ibyaha umunani, nitwo tuza ku isonga mu kugira umubare w’ibyaha byinshi.

Emmanuel N. Hitimana