Iyo mpanuka yabereye mu isangano ry’umuhanda hepfo gato ya Rond Point yo mu mujyi rwa gati, ahitwa kuri Sainte Famille. Polisi yari aho yemeza ko ikosa ryari iry’umumotari wihutaga kandi imodoka yo yari yamaze kwinjira mu muhanda.

Bamwe mu baturage bari aho impanuka iba bemeza ko umumotari nta makosa afite cyane kuko umuhanda uteye nabi ku buryo umuntu atahita amenya ko imodoka ishaka gukata. Ubuto bw’umuhanda nibwo abo baturage bashyize mu majwi: Umwe ati: "Ahubwo ni uko batirukankaga cyane naho ubundi bose bari gushira".

Hari hashize iminota itarenga 15 indi moto igonganye n’imodoka yamanukaga ku muhanda wa Kimihurura, ahitwa kuri KBC.

Mu nama Umuvugizi wa Polisi y’Igihugu, Supt. Theos Badege, yagiranye n’aba bamotari, kuri uyu wa Mbere tariki 19/11/2012, yabasabye gushyira mu mihigo kwirinda amakosa.

Supt. Badege yababwiye ko bishoboka ko umumotari yamara ukwezi adakora amakosa. Gusa bamwe mu bamotari bireguraga bavuga ko impamvu bakora amakosa, ari uko baba biruka bahunga Polisi kugira ngo itabaca amande menshi cyangwa ikabafungira moto.

Ukurikije uburyo impanuka zibamo n’aho zibera, umuntu yakwemeza ko ari ukwirara kw’abamotari, kuko impanuka nyinshi zibera ahatari umupolisi, nk’uko byemezwa n’ababikurikiranira hafi.

Imibare ya Polisi yemeza ko byibura buri munsi hapfa umutu umwe, azize impanuka. Polisi yemeza kandi ko 80% by’impanuka zibera mu mujyi wa Kigali ziterwa n’abamotari.

Emmanuel N. Hitimana