Iki kibazo cy’imbwa zirya amatungo y’abaturage mu murenge wa Mukindo kimaze iminsi kigaragaye, ndetse kuri ubu abaturage bavuga ko ubuyobozi bukwiye kubafasha kureba uburyo cyakemuka kuko ngo nibikomeza nta tungo rizasigara muri aka gace ndetse batekerezako zazadukira n’abantu.

Abatuye muri ako gace cyane cyane mu kagali ka Mukiza batangaza ko amatungo yabo agiye kuzabashiraho nk’uko bishimangirwa n’ umukecuru Adelina Nyanzira utuye muri santere ya Mutunda izo mbwa zamuririye ihene.

Uwihoreye Pascal nawe utuye muri Mutunda aragira ati “Imbwa ziturira amatungo zitugeze kure, aho zibonye itungo zirariraha kandi ntibyoroshye gukomeza gucunga aho inkoko igiye cyangwa ngo umuntu abashe kuguma aho aziritse ihene, ziratwononera cyane rwose bitugeze kure turagomba ubufasha bw’ubuyobozi”.

Ubuyobozi bw’umurenge wa Mukindo butangaza ko iki kibazo bucyizi kuko cyagarutsweho mu nama z’umutekano, kandi ngo basabye polisi ko yabashyikiriza umuti ukoreshwa mu guhashya izo mbwa.

Bigirimana Augustin, umunyamabanga nshingwa bikorwa w’umurenge wa Mukindo, aragira ati “turimo turashaka ubufatanye na polisi kuko twasanze tugomba uburyo polisi isanzwe ikoresha mu gukemura iki kibazo hirya no hino kuko si twe twenyine, ubu rero kiri hafi gukemuka kuko umuti uri hafi kutugeraho”.

Uretse kuba izo mbwa zibasira amatungo magufi cyane cyane ihene, abaturage bagaragaje impungenge ko zishobora no kuzibasira abantu. Kugeza ihene zisaga 10 zimaze kuribwa n’imbwa; utugali twibasiwe cyane ni Mukiza na Gitega.

Clarisse Umuhire