Karimunda wakoraga akazi ko gutwara abagenzi ku igare mu Gasentere ka Base yakoze impanuka amanuka mu Rwamenyo apakiye ibiro 100 bya sima ku igare, akase ikoni riramunanira agonga ibyapa bigwira abantu batatu n’umwana wa kane bari ku muhanda barakomereka cyane.

Nyirantezimana Judith w’imyaka 21, Uwajeneza Stephanie w’imyaka 32, Uwamahoro Jacqueline w’imyaka 24 na Ugiraneza Yvonne w’imyaka 5 bose batuye mu Murenge wa Gashenyi bagonzwe n’igare bari hafi y’umuhanda ubwo barimo guhaha mu gihe uwo umwana we yari hafi y’iwabo abashungereye.

Abakomeretse bahise bajyanwa ku Bitaro Bikuru bya Nemba kugira ngo bakurikiranwe n’abaganga.

Tariki 27/09/2012, abaforomo babakiriye ku Bitaro bya Nemba batangarije umunyamakuru wa Kigali Today ko bose bahageze bataye ubwenge batatu muri bo batangiye koroherwa nubwo bagifite ibikomere ku maso, ku ivi no mu maso.

Uwamahoro Jacqueline yavunitse igufa ry’umusaya, anatakaza amenyo ane kandi akaba afite ikibazo mu bikano aracyasa nk’urembye.

Nyirantezimana amaze koroherwa hasigaye gukira ibikomere byo mu maso. Photo/ N. Leonard

Abakomeretse bose bavuga ko batazi uko byagenze bagaruye ubwenge bari kwa muganga usibye ngo kumva hari ibintu bibituraho.

Nyakwigendera yari atuye mu Kagali ka Rukura, Umurenge wa Gashenyi apfuye asize umugore n’umwana umwe.

Tariki 25/09/2012, mu Kagali ka Muhororo mu Murenge wa Cyabingo undi munyegari yitabye Imana agonzwe n’imodoka ya KBS.

Hagati ya Kanama na Nyakanga 2012, abanyegari batatu bitabye Imana bagonzwe n’imodoka, abandi bane barakomereka bikabije mu mpanuka zabereye mu Karere ka Gakenke.

Nyuma y’impanuka nyinshi zihitana ubuzima bw’abanyegari mu muhanda wa kaburimbo, Polisi ikorera mu Karere ka Gakenke yahagurukiye guca amagare kugendera kuri karimbo mu rwego rwo gukumira izo mpanuka nubwo inzira ikigaragara ko ari ndende.

Nshimiyimana Leonard