Abazi uwo mwana witwaga Nzabeshwahonimana, bavuga ko avuka mu karere ka Nyabihu, mu murengewa Rambura. Yazanywe n’umuntu wari wamurangiye akazi ko kuragira inka ku mugabo witwa Ernest Hegitari, utuye mu murenge wa Rugarama mu karere ka Burera.

Tariki 11/07/2012 Nzabeshwahonimana yagiye kuvoma amazi yo guha inka yaragiraga ku nkombe z’iki kiyaga, agezeyo asanga hari abana bari koga, abiganye kandi we atari azi koga ahita arohama aburirwa irengero, nk’uko Kayitsinga Faustin umunyamabanga nshingwabikorwa w’umurenge wa Rugarama yabitangarije.

Kayitsinga avuga ko ubwo Polisi irinda ikiyaga cya Burera yamaraga kubona umurambo w’uwo mwana, bahise bawujyana kwa muganga kugira ngo berebe nyir’izina icyaba cyamuhitanye.

Yakomeje avuga ko abaganga nibamara kubaha ibisubizo nyabyo, umurambo w’uwo mwana bahita bajya kuwushyingura.

Nta bana bari bakirohama mu kiyaga cya Burera muri ako gace kubera ko Polisi irinda icyo kiyaga yababuzaga koga mo uko bishakiye.

Gusa uwo mwana warohamye mo ni uko nawe atari ahamenyereye, nk’uko Umunyamabanga nshingwabikorwa w’umurenge wa Rugarama abihamya.

Norbert Niyizurugero