Ibi byabaye mu ijoro ryo kuwa 07/05/2013, ubwo uyu nyakwigendera Uzabakiriho yatahaga iwabo yasinze maze agateza amahane agatangira gukubita bene nyina akamena n’ibintu kubera ubusinzi; nk’uko bitangazwa na Magellan Sebatware, umunyamabanga Nshingwabikorwa w’Umurenge wa Mareba.

Avuga ko Ndagijimana ubwo yageraga iwe, yashatse kumukubita ariko ahita ajya mu nzu ye yo ku ruhande itandukanye n’iy’ababyeyi bakunze kwita ikibahima nuko ise nawe ajya mu nzu ye.

Kubera uburyo byari byamubabaje cyane, Ndagijimana ntibyatumye yemera kuryama kuko yahise agaruka yinjira mu nzu y’umuhungu we, amukubise igiti abona ashizemo intege.

Nyuma yo gutabaza abaturanyi n’ubuyobozi, Uzabakiriho yahise ajyanwa ku kigo nderabuzima cya Mareba, aho yahise yoherezwa ku bitaro bikuru bya ADEPR Nyamata maze aza kwitaba Imana bidatize.

Ndagijimana yahise atoroka aracika, ubu akaba agishakishwa n’abaturage ndetse n’inzego za Polisi. Amakuru atangwa n’abaturage avuga ko uyu mwana yari asanzwe ari umusinzi yarananiye abayeyi be.

Inzego za Polisi ndetse n’iz’umurenge zahise zikoresha inama abaturage aho biyemeje gukumira ibyaha nk’ibi bikajya bikemuka bitagombye kuvamo impfu, kandi biyemeza gushyiraho umwete mu gushakisha Ndagijimana kugirango aryozwe urupfu rw’umuhungu we.

Egide Kayiranga