Nsanzumukiza utuye mu Kagali ka Rwungo, Umurenge wa Rugabano mu Karere ka Karongi akurikiranweho gutemagura Bizimana w’imyaka 70 uzwi ku izina rya Munyabarame akoresheje umuhoro kugeza yitabye Imana maze umurambo we akawujugunya mu bwiherero; nk’uko bitangazwa na polisi.

Impamvu yatumye Nsanzumukiza ubu ucumbikiwe kuri Sitasiyo ya Polisi ya Bwishyura, akora icyo gikorwa cya kinyamaswa ikomeje kuba urujijo kuko abaturanyi be bemeza ko atigeze agirana amakimbirana na ise mbere hose.

Polisi ikomeje iperereza kugira ngo hamenyekane impamvu yateye uwo mwana guhitana umubyeyi we. Umurambo wa nyakwigendera wabonwe n’abaturanyi maze babimenyesha Polisi. Uwo murambo wajyanwe ku Bitaro bya Kirinda gukorerwa ibizamini byo kwa muganga.

Umuvugizi wa Polisi y’Igihugu, Supt. Theos Badege, yamaganye icyo gikorwa cy’ubugome. Yasabye abantu bose gukoresha inzira y’ubutabera mu rwego rwo gukemura amakimbirane ari hagati yabo.

Supt. Badege ahamagarira abantu bose kumenyesha ubuyobozi amakimbirambe yo mu ngo mu maguru mashya kugira ngo bayakemura amazi atararenga inkombi.

Naramuka ahamwe n’icyaha, Nsanzumukiza azahanishwa igihano cy’igifungo cya burundu ushingiye ku gitabo cy’amategeko ahana y’u Rwanda.

Nshimiyimana Leonard