Inyinshi mu mpanuka zihitana abantu cyangwa zikabamugaza, ziba zatewe n’uburangare bw’abatwara ibinyabiziga, umuvuduko ukabije, gutwara ikinyabiziga basinze, rimwe na rimwe batazi neza amategeko y’umuhanda cyangwa se n’ikinyabiziga ubwacyo kitameze neza, ibi bikaba bikwiye kwamaganwa bigahagarara nk’uko polisi y’igihugu ibitangaza.

Polisi y’igihugu itanga ingero nko ku itariki 23/04/2013, aho mu turere dutandukanye tw’igihugu hose habaye impanuka eshanu zahitanye umuntu umwe, abandi icyenda bagakomereka bikomeye.

Mu karere ka Rubavu mu murenge wa Rugerero, igikamyo cya rukururana cyagonganye n’ipikipiki yari itwawe n’uwitwa Hakizimana Patrick w’imyaka 48 y’amavuko wahise anitaba Imana uwo mwanya, mu gihe uwari utwaye ikamyo we yahise aburirwa irengero.

Mu karere ka Nyamasheke, umurenge wa Bushekeri, ikamyoneti yagonganye n’ipikipiki maze Harindintwari Yozefu wari utwaye imodoka na Bamporiki Emmanuel wari utwaye moto barakomereka bikabije, ubu bakaba barwariye mu bitaro bya Bushenge.

Mu karere ka Nyagatare, mu murenge wa Karangazi, umwana w’imyaka 4 y’amavuko witwa Uwase Queen yakomeretse bikabije agonzwe n’imodoka Land Cruiser ubwo yambukaga umuhanda, ubu arwariye mu bitaro bya Kiziguro.

Mu karere ka Nyamagabe, umurenge wa Musange, Fuso yari itwawe na Munyengango Mariko yabuze feri maze iragwa.We n’abandi bantu bane bari kumwe barakomereka bikabije, ubu barwariye mu bitaro bya Kaduha.

Mu karere ka Huye mu murenge wa Kigoma, Mushimiyimana Patrick w’imyaka itanu y’amavuko we arwariye mu kigo nderabuzima cya Karambi, kuko yagonzwe na Coaster
y’Impala maze agakomereka bikabije, impamvu z’izi mpanuka zose zikaba zimwe mu zavuzwe haruguru.

Polisi irasaba umusanzu wa buri wese mu kurwanya impanuka.

Umuvugizi wa Polisi ishami rishinzwe umutekano wo mu muhanda, Superintendent Jean Marie Vianney Ndushabandi, aratangaza ko impanuka nyinshi zirimo guterwa n’uburangare bw’abatwara ibinyabiziga, umuvuduko ,…..nyamara byose bishobora kwirindwa aba bashoferi baramutse babyitayeho.

Yibukije abatwara imodoka n’abamotari kwitonda bakirinda impanuka ariko cyane cyane bakirinda kuvugira kuri telefone mu gihe batwaye ibinyabiziga.

Ndushababandi kandi yanibukije abashoferi kwitondera umuhanda mu bihe by’imvura cyane ko umuhanda uba unyerera, imvura nyinshi n’ibihu bituma abashoferi batareba neza mucyerekezo cyabo.

Yanavuze ko hamwe na hamwe ino mvura ituma imihanda icika, ahandi hagacika inkangu ku buryo bizitira urujya n’uruza rw’ibinyabiziga akaba yasabye abagenzi ko ibi bibaye bakwihutira ku bimenyesha inzego z’umutekano.

Polisi y’u Rwanda ikaba yongera kwibutsa abatwara ibinyabiziga ko bagomba kubahiriza amategeko abagenga, ndetse bakubahiriza n’agenga ibinyabiziga n’imitwarire yabyo.

Emmanuel Nshimiyimana