Impamvu yateye uyu musore kwiyahura ntiramenyekana kuko atabanaga n’ababyeyi be yibanaga mu nzu n’undi musore bakodeshaga.

Nk’uko bitangazwa n’abaturanyi ba nyakwigendera ngo uyu mwana yagiraga ababyeyi ariko bose basa nkaho bamutereranye kuko ngo yabaga ukwe kandi akiga ari n’umuzamu ukora ijoro ngo ahembwe abone uko abaho.

Nyina wa nyakwigendera, Mukaneza Marita, ngo yamubyariye iwabo noneho ubwo yashakaga umugabo amusiga kwa nyirakuru aba ariho arererwa.

Uyu Nyirakuru ngo baje kutumvikana kuko ngo yamusabaga ikibanza cyo kubakamo akakimwima nibwo uyu musore yahisemo kumuta aho akajya kwishakira ubuzima.

Baganizi Frederic uyobora akagali ka Cyasemakamba ibi byabayemo yatangaje ko amakuru y’urupfu rw’uyu mwana w’umunyeshuri yamenyekanye ubwo umuhungu babanaga mu nzu bakodeshaga yaje avuye aho yari yagiye agasanga Ndikubwayo yimanitse imbere mu cyumba.

Si ubwa mbere umunyeshuri yiyahuye mu karere ka Ngoma kuko mu mwaka ushize hari uwiyahuye bitewe nuko ababyeyi be batamuhaga minerval n’ibikoresho, hari n’undi kandi wiyahuye nawe bikaba byaraketswe ko yari atwite hanyuma ababyeyi be babimubaza agahita anywa umuti witwa Tiyoda agahita apfa.

Jean Claude Gakwaya