Iyo nzu yari icumbitsemo umuryango w’abantu bane, ugizwe n’umugore n’abana 3. Kimwe n’andi mazu 36 yo muri uwo mudugudu, iyo nzu yari isanzwe yenda kugwa, kuko zabaruwe mu zigomba gusanwa n’Ikigega cya Leta gitera ingunga abarokotse Jenoside batishoboye (FARG).

Umuyobozi w’akarere wungirije ushinzwe imibereho y’abaturage, Uwera Marie Alice, atangaza ko mu karere hari amazu y’abacitse ku icumu akenewe gusanwa asaga ibihumbi bibiri. FARG ikaba ari yo yohereje abatekinisiye bo kuyabarura no kugena ibikenewe.

Iyi nzu yasenyutse, FARG yayishyize mu cyiciro cya mbere cy’urutonde rw’amazu 190 agomba gusanwa.

Nk’umwihariko w’umudugudu wa Nyamugari, Umunyamabanga wa Leta muri Minisiteri y’ubutegetsi bw’igihugu, Alvera Mukabaramba hamwe n’umuyobozi wa FARG basuye abatuye uyu mudugudu, tariki 02/10/2012, babemerera kubasanira amazu n’inkunga y’amafaranga miliyoni eshanu zo kubafasha kwiteza imbere.

Umuyobozi w’akarere wungirije avuga ko iyi nkunga itarabageraho ariko ngo bakomeje gukora ubuvugizi kandi abazajya basenyerwa n’ibiza bazajya batabarwa nk’uko bikorerwa abandi baturage.

Uwari utuye muri iyi nzu yaguye, yari umucumbitsi, akaba yimukiye mu nzu ye iherereye kure y’umuhanda.

Marie Josee Uwiringira