Abanyamaguru bagomba kumenya kubererekera imodoka no gukoresha igice cyabagenewe mu muhanda; nk’uko umuyobozi wa Polisi mu karere ka Kamonyi, CIP Kayihura Alphonse, yabitangarije abitabiriye itangizwa ku mugaragaro ry’icyumweru cyahariwe umutekano mu muhanda, aberekera uko inzira y’abanyamaguru ikoreshwa.

Uyu muyobozi wa Polisi avuga ko iki cyumweru cyatangiye mu Rwanda hose ku cyumweru tariki 18/11/2012, ku rwego rw’akarere ka kamonyi akaba ari ngombwa ko gisobanurirwa abahatuye kuko mu nshingano za Polisi harimo kurengera umutekano w’abantu n’ibintu.

Insanganyamatsiko y’iki cyumweru akaba ari “Umuhanda urimo umutekano, inkingi y’amajyambere arambye”.

Bamwe mu batwara ibinyabiziga bakorera mu karere ka Kamonyi, batunga agatoki abanyamaguru kutubahiriza no kudakatira ibinyanyabiziga bitwaje ko inzego z’umutekano zitajya zibashyiraho ikosa. Bavuga ko haba mu muhanda wa Kaburimbo cyangwa mu w’itaka, inzira y’abanyamaguru iba iteganyijwe, ariko abayubahiriza bakaba bakiri bacye.

Umuyobozi w’akarere ka Kamonyi, Rutsinga Jacques, nawe aributsa abanyamaguru kwitwararika bakirinda impanuka uko bashoboye. Ubu butumwa bukaba butangwa impande zose, aho bifashisha ibiganiro bitangwa n’inzego z’umutekano, basobanurira abaturage kwita ku umutekano wo mu muhanda.

Umuyobozi w’akarere ariko aragaruka ku ruhare rukomeye rw’abatwara ibinyabiziga mu guteza impanuka, kuko mu gihe cyose batagendeye ku muvuduko ukabije, nta mpanuka yakwigera iba.

Arabasaba kwirinda umuvuduko n’ubusinzi; bagateganya n’igihe cyo gukoresha ingendo za bo kuko ahanini bitwaza gukererwa bagatwarira ku muvuduko ukabije.
Kuva mu ntangiro z’umwaka wa 2012, mu karere ka Kamonyi habereye impanuka 63; abantu 43 bakaba barahasize ubuzima, naho abandi 107 barakomereka.

Marie Josee Uwiringira