Ikigage cyangwa ubushera bwitwa “Umurahanyoni” bukunze gucuruzwa muri santere ya Gitare, iri muri uwo murenge. Bamwe mu batuye iyo santere bemeza ko iyo nzoga imenagura umutwe uyinyweye, agasinda cyane kurusha uwanyweye ikigage gisanzwe.

Nizeyimana Jean Claude ushinzwe imibereho myiza y’abaturage mu murenge wa Kagogo avuga ko “Umurahanyoni” ari ikiyobyabwenge kuko wasangaga abagabo ndetse n’abagore bawunywa bakagirana amakimbirane mu ngo, bakarwana.

Iyo nzoga yaguraga amafaranga make ukurikije n’ikindi kigage. Ibyo byatumaga abagabo bamwe bamarira amafaranga yabo mu kabari ingo zabo zigasenyuka.

Mu rwego rwo guca burundu Umurahanyoni, ubuyobozi bw’umurenge wa Kagogo n’inzego z’umutekano zikorera muri ako gace bagiye muri santere ya Gitare maze bajya mu tubari tuwucuruza barawumena wose ku mugaragaro; nk’uko Nizeyimana bisobanura.

Bamwe mu banyweye “Umurahanyoni” bavuga ko abayicuruza bashobora kuba bashyiramo kanyanga bakurikije uburyo usindisha.

Hagenimama Eric abihamya ahakana ko nta kanyanga bashyira mu murahanyoni kuko baramutse bayishyizemo, umurahanyoni wahenda kuko na kanyanga ihenda. Igikombe cy’umurahanyoni bakigurishaga amafaranga 100 cyangwa 150.

Hagenimama asobanura uburyo bakora umurahanyoni muri aya magambo: “Umurahanyoni ni ubushera utereka, iyo ubuteretse bukamara nka gatatu (iminsi 3) ukaza ukamenamo ikivuge, buba bwahiye, buba bwakaze cyane, wabunywa ufite umutwe woroshye ukandika umunani mu muhanda”.

Nubwo Umurahanyoni bawuciye ariko ntihabura abawukora rwihishwa. Niyo mpamvu ubuyobozi bw’umurenge bwafashe ingamba zo kugenzura buri gitondo, utubari two muri santere ya Gitare.

Iyo basanze hari uri gucuruza Umurahanyoni bahita bawumena; nk’uko Hagenimama abisobanura.

Norbert Niyizurugero