Nsabimana avuga ko tariki 07/01/2012 yafashe icyemezo cyo kwiyahura nyuma y’aho iwabo bamwakiye amafaranga ibihumbi 30 yari yakoreye.

Uwitwa Musoni Viateur avuga ko Nsabimana yabanyuzeho agiye ku ruzi rwa Nyabarongo ku cyambu cya Karambo aho akarere ka Bugesera kagabanira n’akarere ka Kamonyi avuga ko agiye kwiyahura kuko iwabo bamwatse amafaranga ye.

Ati “yageze ku ruzi ahita yinagamo maze atangira gusoma maze abasore bari aho ku cyambu bahita bamurohora atarapfa bahita bamujyana mu bitaro bikuru bya ADEPR Nyamata.

Mukakimenyi Emerita nyina wa Nsabimana avuga ko abeshya nta mafaranga bigeze bamwaka. Yagize ati “ uyu mwana ahubwo yari afite ikibazo cyo mu mutwe, wasanga wenda indwara ye yari yasubiriye”.

Abaganga bamukurikirana baravuga ko yatangiye kohoherwa ku buryo mu minsi mike azasezererwa maze agasubira mu rugo.

Egide Kayiranga