Yabigarutseho kuri uyu wa Gatanu 19 Mata 2024, mu nama yiswe ’Amujae High-Level Leadership Forum’, yiga ku iterambere ry’abagore no kubategurira kuba abayobozi beza, yabereye muri Kigali Convention Centre, yitabiriwa n’abagore 42 bari mu myanya y’umuyobozi, baturutse mu bihugu 19 byo ku Mugabane wa Afurika.

Iyi nama kandi yahuje abayobozi batandukanye barimo Ellen Johnson Sirleaf wayoboye Liberia, na Catherine Samba Panza wabaye Perezida wa Centrafrique.

Perezida Kagame yasobanuye uko Abanyarwanda bigobotoye imyumvire yo gutegera amaboko amahanga, bakishakamo ibisubizo.

Perezida Kagame yakomeje avuga ko abantu bicaraga bazi ko niba hari inzara, hari umuntu uzabazanira ibiryo, niba hari icyorezo hari umuntu ugiye kuza kubaha ubufasha.

Ati “Rero twabaga dutegereje gufashwa n’abaturutse hanze, kandi uko kuri kwishe ibintu byose."

Perezida Kagame yavuze ko ubwo u Rwanda rwatangiraga urugendo rwo kongera kwiyubaka, ikintu cy’ibanze kandi gikomeye rwakoze ari uguhindura imyumvire y’abaturage, bumvaga ko hari ugomba kubafasha gukemura ikibazo byabo.

Ati "Igihe twatangiye urugendo rwo kongera kwiyubaka, ikintu twavumbuye twagombaga gukora cyari uguhindura imitekerereze y’abaturage bacu.”

Yavuze ko hari igihe Abanyarwanda bari babayeho bategereje ubufasha buturutse hanze.

Perezida Kagame yavuze ko hashyizwe imbaraga mu kwereka abaturage ko bagomba kuva muri iyo myumvire, bakishakamo ibisubizo.

Ati “Twarabishimangiye cyane kandi twari dufite ingero zo kubyerekana, kwerekana uko dukeneye kuva muri ibyo. Bahawe izo nshingano, bahabwa ibisabwa, batangira kwikorera ibintu.”

Yakomeje agira ati “Ubufasha buturutse hanze, buzahora buza cyangwa bushobora kuba bukenewe, ariko bugomba kubakira ku bintu wowe ubwawe urimo kugerageza gukora.”

Uko u Rwanda rwiyubatse bigaragarira mu izamuka ry’ubukungu bw’Igihugu, kuko Ingengo y’imari y’u Rwanda y’umwaka wa 2023/2024 igera kuri Miliyari 5,115.6Frw. Inkunga z’amahanga zingana na 13% mu gihe inguzanyo ziva mu mahanga zigera kuri 24% by’ingengo y’imari yose.