Abo baturage bakorewe uturima bagaragazaga intege nkeya mu kutwiyubakira, kandi abenshi muri bo bafite ibimenyetso by’imirire mibi mu ngo zabo.

Icyo gikorwa kizatuma benshi mu baturage batagiraga imboga bazibona hafi yabo; nk’uko umuyobozi w’akarere wungirije ushinzwe iterambere n’ubukungu, Emmanuel Mazimpaka, abitangaza.

Mazimpaka avuga kandi ko hashyizweho gahunda yo kuzakomeza gukora igikorwa nk’icyo ku bandi bantu badafite uturima tw’igikoni, no gushyiraho gahunda yo gukurikirana ko dufatwa neza bikorewe ku rwego rw’umudugudu.

Hari abasanga gahunda yo gukorera abantu uturima nk’utwo bidatanga umusaruro kuko abadukorewe bahora bategereje ko batererwamo n’imboga zitandukanye cyangwa ntibafate neza utwo turima; nk’uko Tuyambaze Epiphanie utuye mu murenge wa Hindiro abivuga.

Bamwe mu baturage bavuga hakwiye ibihano ku bantu badafite uturima tw’igikoni kimwe n’abadafite ikayi y’imihigo mu ngo kuko ngo byatuma babyitabira. Icyakora ubuyobozi bw’akarere bwo bushyira imbere ubukangurambaga no gutanga urugero muri ibyo bikorwa.

Ernest Kalinganire