Mukamponga yatangarije Kigalitoday ko yishimiye kubona izi mpinja eshatu ariko ngo ubwo yazaga kwipimisha abaganga bakamubwira ko atwite abana batatu yumvishe yihebye kuko yumvaga ari umutwaro utazamworohera cyane ko asanzwe adafite ubushobozi.

Uyu mubyeyi avuga ko abana batatu biyongereye mu buzima bwe bacyeneye ibibatunga, imyambaro hamwe n’ubwisungane kandi akaba adafite ubushobozi. Yari asanzwe afite umwana umwe.

Abifashijwemo n’abaganga bamubaye hafi, Mukamponga yabyaye nta kibazo. Yageze kwa muganga mu bitaro bya Ngarama saa kumi n’imwe za mu gitondo yitabwaho abyara saa yine n’igice z’igitondo.

Ateruye impinja ebyiri urundi ku ruhande, Mukamponga avuga ko yumva yishimiye abana be nubwo mbere agitwite yabanje kugira impungenge yo kubabyara no kuzabarera.

Mukamponga Annociata hamwe n’impinja yibarutse.

Avuga ko bavutse neza badafite ikibazo kuko uwa mbere yavukanye amagarama 3200, uwa kabili avukana amagarama 2340 naho uwagatatu avukana amagarama 2100. Ikibazo bafite ni ukutabona amashereka abahagije ku buryo avuga ko yumva akeneye abamutera inkunga mu kubona ibibunganira.

Mukamponga yarasanganywe umwana umwe w’umuhungu kuburyo yumvaga azaboneza urubyaro bijyanye n’ubushobozi bwe ariko yatunguwe no kubona yakiriye abana batatu.

Yagize ati “kimwe mu bibazo bimpangayikishije ni kubona ibibatunga, nk’ubu baronka ntibahage kandi bataramenya konka, nkibaza umunsi babimenye uko bizagenda cyane ko nta n’inka ngira ngo amata azanyunganire.”

Ubuyobozi bw’ibitaro bwagerageje kumwitaho kandi n’ubu bukibikora. Ibitaro bugira icyo bugenera abantu babyaye badafite ubushobozi, cyane ko hari undi ukomoka mu karere ka Bugesera wabyaye abana batatu muri 2011 atagira umugabo. Abaganga bashyize hamwe bakusanya inkunga yo kumubonera ibyo akeneye kugeza abonye inzu yo kubaho umurenge umufasha gusubira iwabo.

Umuyobozi wungirije w’akarere ka Gatsibo ushinzwe imibereho myiza y’abaturage, Uwimpuhwe Esperance, avuga ko akarere hari icyo gateganyiriza Mukamponga nubwo katarajya kumureba.

Sylidio Sebuharara