Benimama Immaculee, umufasha wa Nyakwigendera, yavuze ko tariki 31/01/2012, ubuyobozi bwamusabye gutaburura umurambo w’umugabo we kugira ngo wongere kujya gusuzumwa bundi bushya mu gihe ibisubizo bya mbere byasuzumwe n’ibitaro bya Nyanza atigeze abimenyeshwa.

Yabisobanuye muri aya magambo “Ubuyobozi bwaje bumbwira ko ibisubizo babonye basanze atari byo kuko nyir’ivuriro “Gira Ubuzima” ari umuganga wo mu bitaro bya Nyanza wakoreshaga umuforomo Ngirabacu Desiré (watorotse) watorotse”.

Umufasha wa nyakwigendera avuga ko ubuyobozi bw’umurenge wa Mukingo bwakomeje bumubwira ko kuba nyir’iryo vuriro yari muganga mu bitaro bya Nyanza kandi bikaba ari nabyo bisuzuma icyishe Nyakwigendera hari impamvu nyinshi zishobora gutuma ibisubizo bikemangwa. Bamwijeje ko tariki 01/02/2012 bazaba bagaruye uwo murambo ukongera ugashyingurwa.

Tariki 31/01/2012, minisiteri y’ubuzima yasohoye itangazo rivuga ko umuti wa penicillin watewe nyakwigendera Muhigana Alphonse udashobora kwica umuntu cyeretse igihe umubiri w’umuntu uwutewe umugwa nabi cyangwa yawutewe mu buryo butari bwo.

Umurambo wa Muhigana Alphonse washyinguwe ku wa gatanu tariki 27/01/ 2012 mu mudugudu wa karambi mu kagali ka Ngwa mu murenge wa Mukingo mu karere ka Nyanza nyuma yo gusengerwa mu itorero ry’abadivantiste b’umunsi wa karindwi i Rutete aho yari abereye umukuru w’itorero.

Muhigana Alphonse yapfuye tariki 25/01/2012 atewe inshinge eshatu n’umuforomo witwa Ngirabacu Desiré wakoraga ku ivuriro “Gira Ubuzima” riri mu kagari ka Kiruri mu murenge wa Mukingo mu karere ka Nyanza ahita atoroka.

Jean Pierre Twizeyeyezu