Ku ikubitiro uru rubyiruko rwahuguwe ku buzima bw’imyororekere aho hatanzwe ibiganiro binyuranye biganisha ku kumenya imiterere n’imikurire kubuzima bw’umuntu no kubashishikariza kumenya uburyo bagomba kuzatanga ubutumwa ku bajene bazakorana iki gikorwa cyatewe inkunga n’umuryango Imbuto Foundation.

Abakozi bari kumwe na Rusizi Youth Network mu guhugura urubyiruko ruhagarariye abandi basobanuriye uru rubyiruko ibijyanye n’imikoreshereze ndangabitsina yabo cyane cyane mu gihe umukobwa ashobora kuba yatwara inda zitateguwe.

Urubyiruko rwakanguriwe gufasha bagenzi babo mu guhindura imyumvire y’imikoreshereze y’imyanya ndangabitsina yabo kuko hari ababikora bagamije kwinezeza bagakora imibonano idakingiye bityo bagatwara inda zindaro.

Urubyiruko ruratangaza ko mu busanzwe batari basobanukiwe neza ibirebana n’imikoreshereze ndangabitsina ku mibiri yabo ibyo ngo byaba intandaro yo kuba bahura n’ingorane zitandukanye zirimo kuba urubyiruko rwatwara inda zindaro zidateganyijwe nkuko bikunze kubaho rimwe na rimwe.

Aba basore n’inkumi bitabiriye ibiganiro byatanzwe kuri uyu wa 23/09/2013 barimo Karangwa Jules batangaza ko bungutse ubumenyi bw’ingenzi buzabafasha kwitwararika mu bijyanye n’imiterere ndetse n’imikurire ijyanye n’imihindagurikire ku bijyanye n’imyanya ndangabitsina yabo.

Uru rubyiruko rutangaza ko nubwo amasomo basobanuriwe atoroshye kuyumva ngo bazakora uko bashoboye ibyo bumvise bakabisobanurira bagenzi babo.

Mukamurara Helene, umukozi wa Imbuto Foundation ushinzwe umushinga SSFH HIV SIDA mu turere 6 atangaza ko urubyiruko rukiri ruto rufite ibibazo byinshi bakeneye kumenya bigomba kubavana mu rujiyo yasabye buri wese gusobarurira bagenzi babo ibyo bumvise kuko iyo ugiriwe neza nawe uba ugomba kugira neza.

Musabwa Euphrem