Urubyiruko rwaganiriye na Kigali Today ruhamya ko bamwe mu basore n’inkumi bo muri Kinyababa bakora imibonano mpuzabitsina batikingiye kubera kutagira ubumenyi buhagije ku gakingirizo nk’uko Rwankindo Joachim abitangaza.

Agira ati “Oya rwose jyewe mbona bari gupfa kwigendera, ni ukugenda kizimbabwe (gukora imibonano mpuzabitsina idakingiye). None ziriya nda z’indaro zose zaba zituruka he?...ndi kubona abakobwa bari kubyara.”

Rwagati muri Santere ya Kinyababa.

Urubyiruko rwo muri Kinyababa kandi ngo ntirubona udukingirizo hafi kuko udusanduku tw’udukingirizo ubuyobozi bw’umurenge wabo bwashyize muri santere ya Kinyababa, nta gakingirizo na kamwe wasangamo.

Rwankindo agira ati “(udusanduku) byaje ho rimwe ariko iyo ugiye kureba ntabwo bigeze bazanamo utwo dukingirizo.”

Umurerwa Seraphine nawe avuga ko urubyiruko rwo mu murenge wa Kinyababa ruzi agakingirozo ariko ngo kugakoresha nibyo biba ikibazo.

Ngo hari abakorera imibonano mpuzabitsina mu bisambu kuburyo batabona n’umwanya wo kwitegura bihagije ngo babe bakoresha agakingirizo.

Muri santere ya Kinyababa hari udusanduku twagenewe gushyirwamo udukingirizo tw’ubuntu ariko nta na kamwe wasangamo.

Umurenge wa Kinyababa uherereye ahantu h’icyaro. Urubyiruko ruhatuye ruhamya ko no gutura mu cyaro biba intandaro yo gukora imibonano mpuzabitsina idakingiye.

Urwo rubyiruko rwatangiza club Anti-SIDA kugira ngo bakangurire urubyiruko kwifata no gukoresha agakingirizo. Banakangurira urundi rubyiruko rwaho kwipimisha kugira ngo bamenye uko bahagaze batazakomeza kwanduza abandi.

Norbert Niyizurugero