Kuri ubu, Inkambi ya Mahama icumbikiye impunzi z’Abarundi zirenga 40.000. Amasezerano y’iyo nkunga yasinywe hagati ya Leta ya Koreya y’Epfo na UNFPA, akaba avuga ko Koreya izatanga inkunga igera ku bihumbi 450$(ahwanye na miliyoni 335FRW) mu rwego rwo gushyigikira ibikorwa UNFPA isanzwe ikorera muri iyo nkambi.

Jozef Maeriën, uhagarariye UNFPA, yavuze ko intego yabo ari ugukora ibishoboka byose ku buryo umukobwa cyangwa umugore uri mu Nkambi ya Mahama ashobara kubona amakuru n’ibikoresho bimufasha mu kwita ku buzima bwe bw’imyororokere ndetse no kuboneza urubyaro.

Muri Gicurasi 2015, UNFPA yatangije ibikorwa byo kwita ku buzima bw’umwana n’umubyeyi, naho muri Kanama 2015, batangiza ibikorwa byo kuboneza urubyaro mu Nkambi ya Mahama ku buryo abagore 652 bamaze guhabwa uburyo bugezweho bubafasha kuboneza urubyaro.

Maeriën ariko avuga ko bagikeneye gukumira inda zitateguwe, kugabanya ikwirakwizwa ry’ubwandu bwa Sida n’izindi ndwara zandurira mu mibonano mpuzabitsina aho mu Nkambi ya Mahama .

Park Yong-min, Ambasaderi wa Koreya y’Epfo mu Rwanda, yavuze ko iyo inkunga batanze ari igice kimwe cy’inkunga igera kuri miliyoni 200$, iki gihugu kigenera abantu bakuwe mu byabo n’intambara.

Yaboneyeho umwanya wo gusaba ko habaho ibiganiro bya politiki bigamije kurangiza imvururu ziri mu Burundi.