Dr. Uwiringiyemungu Jean Nepomuscène umuyobozi w’ibyo bitaro aratungwa agatoki ko ari we nyirabayazana w’ibyo bibazo nyuma yo kwigira muri gahunda ze akaboneka igihe gito mu kazi bigatuma atabasha gusobanura ibibazo by’ingutu byugarije ibitaro ayoboye.

Abagize Njyanama y’akarere bakomeje kuvuga ko batumva impamvu umuntu ayobora ibitaro nawe ubwe atabibamo ngo amenye ibigenda n’ibitagenda ahubwo akirirwa muri gahunda ze ari nako akoresha zimwe mu modoka z’ibitaro mu nyungu ze.

Umuyobozi w’ibitaro bya Kirehe aratungwa agatoki kuba nyirabayazana wa serivise mbi.

Dr. Uwiringiyemungu ubwo yahabwaga ijambo yavuze ko atari azi ko mu bitaro ayoboye hari ikibazo gusa yemeye imitangire ya service itari myiza avuga ko igitera serivise mbi ari abarwayi benshi baza kwivuza nta mutuelle bafite.

Yakomeje agira ati “ibyo by’imitangire mibi ya serivisi ntabyo nari nzi, naho ibyo muvuga ngo nkoresha imodoka z’ibitaro ndumva nta kibazo kirimo kandi ntaho bihuriye na serivisi mbi itangwa akenshi mba nagiye ku ishuri, erega n’uwo nasimbuye ubwo twari mu ihererekenyabubasha nasanze ibyo bibazo bihari”.

Njyanama y’akarere yari iyobowe na Bugingo Emmanuel umuyobozi wa nyanama wungirije yamuteye utwatsi ivuga ko ikibazo cya mutuelle kiri rusange kandi ibindi bitaro hirya no hino mu gihugu bishimwa mu mikorere myiza mu gihe mu bitaro bya Kirehe hamaze iminsi havugwa imikorere mibi.

Ati “mu bitaro bya Kirehe hamaze iminsi havugwa imikorere mibi, imitangire ya serivise itari nziza itanezeza ababigana byaravuzwe mu itangazamakuru, byaravuzwe mu baturage babyivurizamo birarambiranye bigomba gukemuka byihuse”.

Njyanama yababajwe n’uburyo umuyobozi w’ibitaro atazi ibibazo byo mu bitaro ayoboye.

Mu babangamiwe n’imikorere mibi y’ibitaro bya Kirehe hari bamwe mu bagize Njyanama y’akarere aho umugore umwe muri bo yavuze uko yagiye kwivuriza muri ibyo bitaro abuze abamwitaho kandi arembye afata umugambi wo gutoroka ibitaro ajya kwivuriza i Kigali.

Undi nawe yavuze ko azi abagore bamwe baza kubyarira muri ibyo bitaro nyuma yo kubagwa bakagubwa nabi inda igatumba bagakizwa no kujya kwivuriza mu bindi bitaro.

Mu bidindiza imikorere myiza y’ibitaro hakomeje gutungwa agatoki umuyobozi wabyo aregwa kuba imbonekarimwe mu bitaro ayoboye ntanakurikirane n’imibereho y’abaharwariye ari nako muri izo gahunda ze akoresha imodoka z’ibitaro.

Depite Berthe Mujawamariya yanenze abakinisha ubuzima bw’abantu.

Umuyobozi w’akarere wungirije ushinzwe imibereho myiza y’abaturage Murekatete Jacqueline mu ijambo rye nk’umuntu wahakoreye ubugenzuzi yavuze ko ikibazo cy’imikorere mibi igaragara mu bitaro bya Kirehe imaze gufata indi ntera.

Yagize ati “ni kenshi tujya mu bitaro bya Kirehe tukabagira inama kubyo bagomba gukosora, ibyinshi byagiye bijya mu buryo ariko ikijyanye na serivise nziza cyo tubona kidahinzuka zinzi icyakorwa”.

Yakomeje avuga ko mu bitaro usanga n’abakozi ubwabo bakora basa naho bigenga kuko umuyobozi w’ibitaro atabibonekamo ngo akenshi aba yigiriye muri gahunda zitazwi ari nako aba yatwaye n’imodoka y’ibitaro atabiherewe uburenganzira.

Umuyobozi w’akarere wungirije ushinzwe ubukungu, Tihabyona Jean de Dieu, yavuze ko uwo muyobozi bamugiriye inama kenshi yo kudakoresha imodoka z’ibitaro mu nyungu ze yanga kubireka bigera n’aho bamutegeka kuzandikaho amazina aziranga.

Depite Berthe Mujawamariya wari watumiwe muri iyo nama n’agahinda kenshi yavuze ko ibitaro bya Kirehe bimaze kugira isura mbi mu gihugu haba mu mitangire mibi ya serivise haba no mu bijyanye n’isuku.

Ati “aba bantu bagomba kwandikirwa nta mpamvu yo gukina ku buzima bw’abantu hagomba gufatwa ibyemezo udatanga serivise ave mu nzira udashaka kuvura abantu avemo, nawe muganga mukuru nta mpamvu yo kuzana mama wararaye ku buzima bw’abantu niba utabishoboye tanga ibihoho haze abandi, njye narahigereye ndeba amashuka abarwayi bararamo ndeba uko isima isa birarenze bikosorwe vuba”.

Ibitaro bya Kirehe.

Bamwe mu baganga bavurira muri ibyo bitaro twaganiriye batifuje ko amazina yabo atangazwa baravuga ko akenshi imikorere mibi iterwa n’umuyobozi wabo ushaka gutonesha abakozi bamwe ndetse agatanga n’akazi nta piganwa rikozwe ari nako abandi ashaka kubakandamiza bigatera umwuka mubi mu mikorere.

Muzungu Gerald umwe mu bagize nyanama akaba n’umuyobozi w’akarere ka Kirehe yemereye Njyanama ko icyo kibazo nyobozi y’akarere igiye kugikurikirana bitarenze ibyumweru bibiri imyanzuro ikaba yagejejwe muri Njyanama.

Si njyanama n’abahavurirwa gusa babona imikorere mibi y’ibyo bitaro kuko hashize iminsi Minisitiri w’Ubuzima yandikiye ibigo nderabuzima bya Rutonde na Mahama byo mu karere ka Kirehe ibyihanangiriza ku birebana na serivise mbi zihatangirwa.

Servilien Mutuyimana