Hibanzwe ku bafite ikibazo cy’ubugumba (sterilite), ahasuzumwe imiryango ibana 150 barimo umugore n’umugabo n’abandi bagore 50.

Dr. Alfred Rutagengwa, umuyobozi w’ibitaro bya Nyamata, yavuze ko mu Rwanda hakenewe ikigo cyafasha ababyeyi kwibaruka mu buryo bw’ikoranabuhanga buzwi ku izina rya fecondation in vitro, ko ubwo buryo bwagabanya ubukana bw’ikibazo cyo kutabyara kigaragara mu miryango imwe n’imwe.

Yagize ati: “N’ubwo abantu babaye benshi ndabahumuriza mbabwira ko bazakomeza gukurikiranywa n’ibitaro bya Nyamata byaba ngombwa bakazoherezwa no ku bindi bitaro kuko abaganga b’Abanyarwanda bahari kandi b’inzobere.”

Ikibazo cyo kutabyara gikomereye imiryango itari mike kuko uretse umubare munini w’abari baje mu bitaro bya Nyamata, aho abaturage baturutse hirya no hino mu gihugu no mu gihugu cy’u Burundi bafite ibibazo byo kutabyara baje bagana abo abaganga.

Glibert Nyiribakwe yaje kwivuza ari kumwe n’umugore we Mukantwari Adela bakaba bavuye mu kagari ka Batima mu murenge wa Rweru.

Ati: “Tumaze imyaka icumi tubana nta mwana turabona, twagerageje kwivuza ahantu henshi hatandukanye biranga ariko ubu aba baganga mbafitiye icyizere imiti batwandikiye tugiye kuyifata neza wenda Nyagasani nayo yadufasha maze tukabona akana.”

Muri abo bari baje kwivuza, harimo umugore utarashatse ko amazina ye atangazwa umaze amezi ane umugabo we amwirukanye kubera ko bamaranye imyaka irindwi batabyara.

Ababonanye n’inzobere z’Abafaransa bahawe imiti, abandi bandikirwa ibizamini. Ishyirahamwe ry’abaganga mu Bufaransa ryohereza inzobere mu Rwanda buri mwaka ariko ni ubwa mbere ibitaro bya Nyamata byakiriye inzobere mu kuvura ubugumba.

Egide Kayiranga