Ikigo Nderabuzima cya Rugarama gifunguye imiryango nyuma y’igihe kigera ku kwezi Kigali Today ikoze inkuru igagaza uburyo kimaze amezi atandatu cyuzuye, gitwaye amafaranga y’u Rwanda abarirwa muri miliyoni 200, ariko kidakora kandi cyaregerejwe abaturage ngo kibahe serivisi z’ubuvuzi.

Iki Kigo Nderabuzima cya Rugarama cyari kimaze amezi atandatu cyuzuye kidakora cyatangiye kuvura abarwayi.

Icyo gihe abaturage badutangarije ko bayobewe impamvu icyo kigo nderabuzima kidatangira kubavura kandi mu kwezi kwa kwa 08/2014, ubwo imirimo yo kucyubaka yarangiraga, bizezwaga ko bazatangira guhabwa serivisi bidatinze.

Ubuyobozi bw’Akarere ka Burera icyo gihe bwavuze ko icyatumye ikigo nderabuzima cya Rugarama gitinda gutangira gukora ari ingengo y’imari ikigenewe yaburagara ndetse n’ibikoresho bari bemerewe na Minisiteri y’Ubuzima mu Rwanda (MINISANTE) byari bitaraboneka.

Ku wa mbere tariki 06 Mata 2015 iki kigo nderabuzima ni bwo cyatangiye guha abaturage serivisi z’ubuvuzi. Ibyo byatumye ku wa kabiri tariki 07 Mata 2015, Kigali Today isubira kugisura ngo irebe uko serivisi z’ubuvuzi ziri gutangwa.

Iyo ugeze kuri icyo kigo nderabuzima, gisize irangu ry’umweru inyuma, usanga imiryango ifunguye abarwayi baje kwivuza bari kwinjira abandi bari aho babakirira barindiriye gusuzumwa. Aba bose bigaragara ko bishimiye kuba batangiye kwivuriza hafi.

Niyihoza Sandrine wabyariye bwa mbere mu Kigo Nderabuzima cya Rugarama yishimira ko begerejwe serivisi z’ubuvuzi.

Ubwo twageraga muri icyo Kigo Nderabuzima twasanze hari ababyeyi babiri bo mu murenge wa Rugarama, bari baraye babyariyemo.

Niyihoza Sandrine, wabyariye bwa mbere mu kigo nderabuzima cya Rugarama, avuga ko kuba icyo kigo nderabuzima kiri hafi byamufashije cyane.

Agira ati “Nafashwe nza hano mu kigo nderabuzima, banyakiriye neza, hashinze nk’iminota 20 ngeze hano mba nibarutse umwana w’umuhungu, none ndi kubishimira Imana.”

Uzamushaka Beatrice, na we wibarukiye muri icyo kigo nderabuzima, agira ati “Ikigo nderabuzima mwarakoze kugishyira bugufi, kuko byatwihutiye kugira ngo duhite tugera ahangaha…”

Bivurizaga kure

Aba babyeyi kimwe n’abandi batangiye kwivuziza ku Kigo Nderabuzima cya Rugarama, bahamya ko mbere kitaratangira kubaha serivisi, bajyaga kwivuriza ku Kigo Nderabuzima cya Kinoni, kiri mu murenge wa Kinoni, mu karere ka Burera.

Ku munsi wa mbere Ikigo Nderabuzima cya Rugarama gifunguye imiryango cyakiriye abarwayi babarirwa muri 50.

Bahamya ko hari kure yabo kuburyo hari abahageraga bakoze urugendo rw’ibilometero 10.

Ibyo ngo byatumanaga abarwayi barembera mu nzira, ababyeyi bamwe bo bakabyarira mu nzira. Ariko ubu ngo bazajya bagera kwa muganga vuba, bivuze batararemba.

Ikindi ngo ni uko kwivuriza kure byatumaga hari bamwe bivuza magendu, ntibirirwe bitabira gahunda y’ubwisungane mu kwivuza, Mitiweri; nk’uko Nkurunziza Jean Bosco abihamya.

Agira ati “Nk’ubu hari abantu bari bagishaka ibyatsi! Mu Kinoni (kwa muganga) akumva ni kure, yaba yarembye agaca imiravumba n’imibirizi agasekura akaba aribyo anywa.”

Umuyobozi w’Ikigo Nderabuzima cya Rugarama, Niyitegeka Elisabeth, avuga ko icyo kigo nderabuzima kije gikenewe. Kigiye kujya giha serivisi z’ubuvuzi abaturage babarirwa mu bihumbi 24, batuye mu Murenge wa Rugarama, bajyaga kwivuriza ahandi kure yabo.

Akomeza avuga ko icyo kigo nderabuzima bigaragara ko kizakira abantu benshi kuko kiri hafi y’umuhanda. Ibi akaba abivuga abihera ku kuba ku munsi wa mbere bafunguye barakiriye abisuzumisha babarirwa muri 50.

Niyitegeka yongeraho ko batangiranye ibikoresho bike ariko by’ibanze, bahawe na MINISANTE. Kuri ubu ngo bashobora kwakira abarwayi 25 barara. Abisuzumisha bo ngo bashobora no kwakira abarenga 100.

Avuga ko ariko mu kwezi kwa Gicurasi 2015, MINISANTE izabaha ibindi bikoresho noneho bagatangira gukora neza.

Ikigo Nderabuzima cya Rugarama kuri ubu gifite abaforomo 10 n’abandi babiri bakora ahasuzumirwa indwara.

Norbert NIYIZURUGERO