Nyuma yo kubyara umwana akaba amaze imyaka 14 atavuga; atabona; atagenda ndetse adashobora no kwicara kubera uburwayi nabo batazi, abo babyeyi baratabaza bavuga ko bamaze kunanirwa kumwitaho nta bufasha babona.

Mukasikubwabo arasaba umugiraneza wamufasha nyuma yo kurwaza uyu mwana

Mukasikubwabo nyina w’uwo mwana agira ati“ Ubu rwose njye ndananiwe usibye kwihangana bya kibyeyi, kumuterura buri kanya mujyana mu bwiherero birangora rwose maze kuruha mbonye nka rya gare ry’abafite ubumuga byarushaho kunshimisha dore ko nta bushobozi mfite bwo kurigura”.

Yakomeje agira ati “umugiraneza wese wamfasha Imana nawe yazamuhemba kandi nanjye nahora musabira imigisha”.

Aba babyeyi bavuga ko kubera kwita kuri uwo mwana rimwe na rimwe bibatera ikibazo cyo kubura umwanya uhagije wo kujya guca inshuro, bakavuga ko rimwe na rimwe iyo babonye uwo bajya guhingira bamusiga mu nzu bagasiga bafunze kugira ngo bashake amaramuko.

Uyu mwana n’ubwo afite imyaka 14 ntashobora no kwicara

Uyu mwana ngo akivuka yabonaga gake ndetse ngo yigeze kugerageza no kugenda ariko uko agenda akura akagenda asubira inyuma ageze mu myaka itanu birangira adashobora no kunyeganyega iyo agerageje kuvuga avuga nk’inyoni.

Ababyeyi be bavuga ko bagannye amavuriro anyuranye yo muri ako karere ariko biba iby’ubusa bananiwe bamujyana mu rugo kuko badafite ubundi bushobozi bwo kuba bagana amavuriro akomeye ndetse ngo n’ubuyobozi bukaba buzi icyo kibazo n’ubwo butagize icyo bugikoraho.

Bavuga ko abana bavukana nawe ko nta kibazo bigeze bagira bakaba bafite ubuzima buzira umuze.

Servilien Mutuyimana