Ibi babitangaje kuri uyu wa 31/10/2014, ubwo basozaga amahugurwa y’iminsi 2 yari agamije kubakangurira icunga mutungo ry’ibyo binjiza. Aya mahugurwa yateguwe n’umuryango SEDC ushinzwe kugenzura amakoperative y’abajyanama b’ubuzima ku bufatanye bwa minisiteri y’ubuzima.

Habiyeremye Jean de Dieu ashinzwe gukurikirana Amakoperative y’abajyanama b’ubuzima mu karere ka Ruhango, yasobanuye ko aya mahugurwa aba yateguwe kugirango amakoperative y’abajyanama b’ubuzima ashobore kugira imicungire myiza.

Nyuma y’ibikorwa byo kwita ku kugira inama abaturage uko bitwara mu buzima bwabo, ngo banafata umwanya wo gukora ibikorwa bibateza imbere. Aho usanga bamwe bibumbiye mu makoperative akora ibintu bitandukanye nk’ubworozi n’ubuhinzi.

Abajyanama b’ubuzima bitabiriye aya mahugurwa, bavuga ko bayungukiyemo byinshi, ariko bakavuga ko hari byinshi bagikeneye kwihuguramo, kugirango iterambere ryabo rirusheho kugera ku ntego.

Hakizimana Gad ni umujyanama w’ubuzima mu kagari ka Nyarurama mu murenge wa Ntongwe, avuga ko hari byinshi bagenda bageraho mu iterambere, kuko ngo badahera mu kubungabunga ubuzima bw’abantu gusa.

Aba bajyanama b’ubuzima, bemeza ko hari impinduka nyinshi zabayeho mu guteza imbere imibereho myiza y’abaturage. Akarere ka Ruhango gafite amakoperative 14 y’abajyanama b’ubuzima agizwe n’abantu 1500.

Eric Muvara