Amaraso ingabo zizatanga ategerejweho gukomeza gufasha Abanyarwanda, nk’uko Gen. Augustin Turagara, umuyobozi w’ikigo cya gisilikare cya Kanombe yabitangaje ubwo yatangizaga ku mugaragaro iki gikorwa kuri uyu wa 24/06/2014.

Habanzaga gukorwa ibizami byinshi kugira ngo amaraso apimwe ubuziranenge.

Yagize ati “Mu Rwanda rwacu ntacyo tudashobora gukora kugira ngo ubuzima bw’Abanyarwanda bube bwiza. Ni muri urwo rwego twasabye ko ibyo twakora byose by’umusada habaho no gutanga amaraso yacu kugira ngo afashe abandi.

Ariko mujye mwibuka ko hari n’igihe mwayamenaga mu kigarama ukaba wanapfa n’amaraso yamenetse tukagushyingura bikarangira. None aya ni ukuyakuramo akaramira mugenzi wawe nawe ejo akazakuramira igihe uyakeneye.”

Abasirikare bitabiriye igikorwa cyo gutanga amaraso ku bushake ari benshi.

Ku ruhande rw’Ikigo cy’igihugu gishinzwe gutanga amaraso, iki gikorwa cya gisirikare kizongera ikigega cy’amaraso mu Rwanda, nk’uko byatangajwe na Dr. Gatare Swaibu uyobora iki kigo.

Yatangaje ko u Rwanda ruhagaze neza mu gutanga amaraso ariko hakiri intambwe igomba gukorwa kugira ngo u Rwanda rugere ku ntego y’ishami ry’umuryango w’abibumbye ryita ku buzima, risaba ko byibura muri buri gihugu abantu 10 mu 1000 bagomba kuba batanga amaraso.

Abasirikari bato n’abakuru bitabiriye gutanga amaraso.

Mu Rwanda ho iki kigero kigeze ku bantu 4,5/1000 mu gutanga amaraso. Kugira ngo amaraso akenewe aboneke iyi iki kigo gifite gahunda yo kugera mu bigo byose byaba ibyikorera n’ibya Leta basaba amaraso.

Emmanuel N. Hitimana