Umuyobozi w’akarere Samuel Sembagare avuga ko umushinga RLDSF (Rwanda Lacal Development Support Fund) wabateye inkunga ya Miliyoni 200 z’amafaranga y’u Rwanda yo kubaka ikigo nderabuzima cya Rugarama.

Agira ati: “Ubu dufite miliyoni 200 z’igice cya mbere twahawe n’ikigega RLDSF.” Akomeza avuga ko imirimo yo kubaka ikigo nderabuzima cya Rugarama izatangiravuba kuko isoko ryo kucyubaka ryatanzwe.

Icyo kigo nderabuzima ngo cyizubakishwa arenze miliyoni 200 kuko ngo kizaba kiri ku rwego rwo hejuru; nk’uko Sembagare abihamya.

Ubuyobozi bw’akarere ka Burera mu myaka ishize bwizezaga abanyarugarama ko bagiye kubakirwa Ikigo Nderabuzima ariko bikarangira kitubatswe.

Mu mwaka w’imihigo wa 2012-2013, ubuyobozi bw’akarere ka Burera bwari bwahize Ikigo Nderabuzima cya Rugarama, ariko ntibyaje kugerwaho kuburyo ubwo buyobozi bwasabye ko uwo muhigo ukurwa mu yindi bari barahize.

Ubwo buyobozi bwavuze ko impamvu uwo muhigo wagombaga gukurwa mu yindi ari uko nta mafaranga yari ahari yo kubaka icyo Kigo Nderabuzima.

Inkunga y’amafaranga bari baremerewe na Minisiteri y’Ubuzima mu Rwanda (MINISANTE) kugira ngo imirimo yo kucyubaka itangire, ntibahiyawe icyo gihe, nk’uko ubuyobozi bw’akarere ka Burera bwabitangaje.

Ikindi ngo ni uko, icyo gihe, kuba MINISANTE itarateye iyo nkunga ubwo buyobozi ari uko ntayo yari ifite yagenewe uwo muhigo.

Icyo Kigo Nderabuzima nicyuzura kizafasha cyane abaturage bo mu murenge wa Rugarama kuko bivurizaga kure mu yindi mirenge baturanye: mu Kinoni, mu Gahunga cyangwa mu Cyanika.

Ikindi ni uko umurenge wa Rugarama ariwo wari usigaye utagira Ikigo Nderabuzima mu mirenge 17 yose igize akarere ka Burera.

Norbert NIYIZURUGERO