Kuba abaforomo n’abaganga hari uburyo bakiramo abarwayi butabanogeye byagiye biterwa ahanini n’uko nta mategeko agenga abakora uyu mwuga rimwe na rimwe bikiyongeraho ko abenshi baba batarabyize, nk’uko bitangazwa Agnes Uwayezu, uyobora inama y’ubutegetsi muri NCNM.

Mu kiganiro n’abanyamakuru kuri uyu wa Gatatu tariki 09/10/2013, Uwayezu yatangaje ko hashize igihe nta serivisi yihariye ireberera abaforomo ariko aho iki kigo kiziye usanga na none abantu batitabira gutanga ayo makuru nk’uko bikwiye.

Yagize ati: “Dufite uburyo abantu bashobora kwifashisha batanga ibirego. Ushobora kwandikira inama y’igihugu ko wakorewe ubuvuzi ahantu aha naha butajyanye tugakurikirana ariko ugomba kubitumenyesha.

Kenshi abaturage baratubwira, kenshi babibwira Minisiteri hari nomero itishyuzwa abaturage bajya bahamagaraho Minisiteri ikabitwoherereza natwe tukabikurikirana.”

Uwizeye n’abandi bayobozi bahagarariye NCNM mu kiganiro n’abanyamakuru.

Amakosa menshi y’abaforomo ni uburangare no kuza ku kazi umukozi yanyweye. Gusa hari n’andi makosa abaforomo bakora atabaturutseho, icyo gihe bigasaba ko hakorwa iperereza.

Kugeza ubu hamaze guhagarikwa burundu abaforomo babiri bamburwa n’uburenganzira bwo gukorera mu Rwanda n’abandi benshi bagiye bahagarikwa amezi atandukanye bitewe n’uburemere bw’ibyaha bakoze.

Iki kigo kandi kimaze imyaka igera kuri itanu gihawe inshingano zo gukurikirana abaforomo mu rwego rwo kugira ngo abarwayi bahabwe serivisi zinoze, gikangurira abafite amavuriro yigenga gusaba abo bakoresha kuzuza ibyangombwa by’ubunyamuryango kugira ngo bizerwe mu mikorere yabo.

Umuforomo cyangwa umubyaza ufite icyemezo gitangwa na NCNM niwe wenyine uba wemerewe gukorera mu Rwanda. No mu gihe hagaragaye ikibazo iki kigo kimufasha gukurikirana ariko yaba nta byangombwa afite agakurikiranwa mu nzego z’ubutabera.

Hateganyijwe amatora kuri komite y’ubutegetsi bw’iki kigo azaba tariki 11/10/2013. Abazatorwa bakazaba bafite manda y’imyaka ibiri yo gukomeza kuzamura imikorere y’iyi nama.

Emmanuel N. Hitimana