Aba banya-Etiyopiya bari mu Rwanda mu gihe cy’icyumweru mu rugendo shuri rugamije kwiga uko u Rwanda rwitwara mu gukumira ikwirakwizwa ry’ibicurane by’ibiguruka ndetse no mu kubivura hakiri kare.

Nk’uko bitangazwa na Abyot Bekelle ukuriye urwego rwo gukumira ibyorezo muri minisiteri y’ubuzima ya Etiyopiya, akaba n’uwari uhagarariye iri tsinda, avuga ko nyuma yo gusura ibigo bitandukanye, yavuga ko u Rwanda ruri imbere muri iyi gahunda.

Ati: “Gahunda yo gukumira ikwirakwizwa ry’ibicurane bikomoka ku biguruka mu Rwanda iteguye neza cyane, ibi rero ndumva igihugu cyacu cyabyigira ku Rwanda, kuko natwe dufite gahunda yo gushyira imbaraga muri uru rwego”.

Dr Ndekezi Deogratias, umuyobozi w’ibitaro bya Ruhengeri, avuga ko u Rwanda ruri imbere mu bijyanye no kugenzura ikwirakwiza ry’ibicurane bikomoka ku biguruka muri Afurika, ndetse ngo ibitaro bya Ruhengeri ni bimwe mu bikorerwamo igikorwa cyo kuyigenzura.

Ati: “Iyo umurwayi agaragaje ibimenyetso byo gukorora n’umuriro mwinshi, tumufata ibizamini tukabyohereza muri RBC maze mu gihe kitarenze icyumweru ibisubizo bikaba byabonetse”.

Avuga kandi ko ibitaro bya Ruhengeri ari bimwe mu bitaro byatoranyijwe kugirango bikorerwemo ibijyanye no kugenzura no kurwanya agakoko gakwirakwiza ibicurane bikomoka ku biguruka riko ‘Influenza’.

Nyuma yo kuganirizwa ku mikorere y’iyi gahunda, aba banya-Etiyopiya bagejejwe ahafatirwaga ibizamini by’umuntu ufite ibimenyetso, babereka uko babibika kugirango babashe kubyohereza ngo bipimwe.

Jean Noel Mugabo