Ministiri w’ubutegetsi bw’igihugu yasobanuye ko kwimurira Mituelle muri RSSB (nk’uko byemejwe mu mwiherero), bizatuma abafite amakarita y’ubwo bwishingizi bagura umuti muri farumasi ku giciro cyagabanyijwe, nk’abafite ubundi bwishingizi. Ati “Bizorohereza umuturage wese ufite mituelle, kuko iyo miti uzaba uyiguze muri farumasi isanzwe ikorana na RSSB”.

Ministiri Musoni yatangaje ibi mu nama abagize Guverninoma bagiranye n’abanyamakuru ku wa kabiri tariki 11/3/2014, ubwo basobanuraga imyanzuro yafatiwe mu mwiherero w’abayobozi bakuru, wari umaze iminsi ubera mu kigo cya Gabiro mu karere ka Gatsibo.

Yavuze ko kuba umurwayi ashobora kugabanyirizwa ikiguzi cy’umuti muri farumasi ikorana na RSSB, ari ikindi cyiza cyo gutanga umusanzu w’ubwishingizi bw’ubuvuzi, nyuma y’aho umuntu wese ufite ikarita ya mituelle ashobora kuyivurizaho ahantu hose ageze mu gihugu.

Ministiri Musoni yamaze impungenge abatekereza ko hari gahunda yo kuzamura imisanzu abaturage batangaga, akavuga ko ahubwo Leta igamije gufasha gucunga neza imisanzu batanga muri mituelle.

Munisitiri Musoni James (hagati) asobanura uburyo mitiweli igiye kujya icungwa n’ikigo cy’ubwiteganyirize RSSB.

Akaba yahakanye ko igikorwa cyo kuvugurura ibyiciro by’ubudehe (nacyo giteganijwe vuba nk’uko umwiherero wabyemeje), kitazatuma amafaranga abaturage batanga muri mituelle yongerwa.

Inama abagize Guverinoma bagiranye n’abanyamakuru yasobanuye kandi ishimangira imyanzuro 42 yafatiwe mu mwiherero w’abayobozi bakuru b’Igihugu, wabereye mu kigo cya Gisirikare cya Gabiro mu karere ka Gatsibo kuva tariki 07-10/3/2014.

Iyo myanzuro yibanze ku kwihutisha ibikorwa n’imishinga yongera ishoramari mu gihugu, harimo itanga ingufu, ubwubatsi bw’inganda, amazu aciriritse yo kubamo, kongera umusaruro w’ubuhinzi hakoreshejwe imbuto z’indobanure, ifumbire no kuhira imyaka; hazanagabanywa ikiguzi cyo gushora imari mu Rwanda no kurushaho kumva no gukemura byihuse ibibazo abashoramari bashobora kugira.

Simon Kamuzinzi