Batanze serivisi zitandukanye zirimo ubuvuzi bw’amenyo, ubw’amaso, serivisi z’ububyaza ndetse no kuvura indwara zitandukanye ku kigo nderabuzima cya Rukara i Karubamba.

Mu ndwara zagaragaye cyane mu nkambi ya Rukara harimo indwara zisanzwe nka marariya, rubagimpande, indwara z’uruhu n’izindi ndwara ziterwa n’isuku nkeya zirimo n’impiswi ku bana bakiri bato, nk’uko Rumenge Alain umwarimu wigisha muri iyo kaminuza wari unayoboye icyo gikorwa yabidutangarije.

Hari ahagaragaye ikibazo cy’ibiheri n’imbaragasa mu biryamirwa bya bamwe mu bari mu nkambi, ku buryo ahantu hose ngo hatewe umuti wica udukoko turimo ibiheri, imibu n’imbaragasa.

Mu ndwara z’uruhu ngo hagaragayemo n’indwara y’ibihara kuri bamwe mu bavuwe, ariko yo ngo ikaba ishobora kuba iterwa n’ubucucike bw’abantu bari mu nkambi bakayanduzanya kuko yo ngo idaterwa n’isuku nkeya.

Bamwe mu bari mu nkambi ya Rukara bavuga ko ikibazo cy’isuku nkeya giterwa n’uko hari bamwe badashishikarira gukora isuku aho baba, bigatuma n’abagerageje kuyikora basa n’abaruhiye ubusa kuko bose baba batabyitayeho, nk’uko Nzamukosha Janet abivuga.

Ati “Hari nk’abantu baba bifitiye isuku nkeya, wagerageza gukora isuku ukabona undi ntabikoze nk’uko wabikoze, hakabaho aboga hakabaho abatoga, wenda yava nko mu bikoni bye akumva ararushye agahita yiryamira. Imbaragasa zirahari n’ibiheri birahari, iyo udakoze isuku ntukubure ntiwoge, ibyo byose biragusanga.”

Rumenge avuga ko mbere y’uko abo baturage bavurwa babanza kwigishwa ku bintu bitandukanye birimo no kubashishikariza kugira isuku mbere yo kubavura.

Cyakora kuba abo baturage baba badafite ibikoresho bihagije by’isuku ngo byaba ari byo bituma bahura n’izo ndwara.

Hari bimwe mu bikoresho by’isuku abo banyeshuri n’abarimu ba bo bageneye abari mu nkambi ya Rukara, birimo amasabune n’impapuro z’isuku abagore bakoresha bari mu mihango.

Kwegereza serivisi z’ubuvuzi abo Banyarwanda birukanywe muri Tanzaniya ngo biri muri gahunda y’inshingano iyo kaminuza ifite zo gutanga serivisi z’ubuzima kuri sosiyete.

Ni igikorwa cyatewe inkunga na minisiteri ishinzwe impunzi n’imicungire y’ibiza, MIDIMAR, kuko abanyeshuri n’abarimu b’iyo kaminuza basuzuma abarwayi bakanabandikira imiti, abarwayi bakayifata muri farumasi y’ikigo nderabuzima cya Rukara batishyuye.

Cyprien M. Ngendahimana