Umunyamabanga wa Leta muri minisiteri y’Ubuzima ushinzwe ubuzima rusange n’ubuvuzi bw’ibanze, Dr Anita Asiimwe yabwiye Kigali Today ko impamvu nyamukuru y’iyi nama ari ukuganira ku nzitizi zibangamira imitangire ya serivise nziza z’ubuvuzi kugira ngo hashakwe ibisubizo.

Umunyamabanga wa Leta muri MINISANTE ushinzwe ubuzima rusange n’ubuvuzi bw’ibanze, Dr Anita Asiimwe aganira n’Abayobozi b’ibitaro by’uturere.

Minisitiri Asiimwe yavuze kandi ko iyi nama bahisemo kuyikorera ku bitaro bya Kibogora kuko basanze ibi bitaro ari icyitegererezo mu kugira isuku, bityo ngo kuhazana abandi bayobozi b’ibitaro bakazareberaho uburyo bwo kwita ku isuku bazageza mu bitaro bayoboye.

Dr Anita Asiimwe agaragaza ko n’ubwo ibitaro bya Kibogora bimaze igihe kinini ndetse bikaba bifite inyubako zikuze, ariko ngo amagenzura menshi kandi mu gihe kirekire yagaragaje ko ibyo bitaro byita ku isuku cyane, bityo ngo abayobozi b’ibindi bitaro mu gihugu bakaba bakwiriye kuhakura isomo ryo kwita ku isuku mu bitaro bayobora kandi bakabona ko kwita ku isuku bitagombera amafaranga menshi cyangwa ubundi bumenyi buhambaye, ahubwo ko ari ukubyitaho kandi umuntu akumva ko bikwiriye.

Aha abayobozi b’ibitaro baratambagira ibitaro bya Kibogora birebera uko byateye imbere mu kwita no kunoza isuku.

Dr Asiimwe yasobanuye ko impamvu bakoreye iyi nama i Kibogora byari nko kujyana abayobozi b’ibitaro mu rugendoshuri ku isuku mu bitaro bya Kibogora dore ko ngo hari n’ibitaro bagezemo bagasanga ntibyita ku isuku uko bikwiye kandi ngo ku bantu batanga serivise z’ubuzima baba bakwiriye kwita ku isuku cyane.

Gahunda yo kubungabunga isuku mu bitaro bya Kibogora kandi yongeye gushimwa n’abaganga bayobora ibitaro by’uturere hirya no hino mu gihugu ubwo batambagizwaga ibi bitaro mbere y’uko batangira inama nyirizina.

Dr Mutaganzwa Avite uyobora ibitaro bya Ruri mu karere ka Gakenke yavuze ko n’ubwo inyubako z’ibitaro bya Kibogora zigaragara nk’izishaje ariko bahakuye amasomo akomeye bazajyana mu bitaro byabo.

Abayobozi b’ibitaro bya buri karere mu Rwanda bateraniye mu nama nyunguranabitekerezo i Kibogora mu karere ka Nyamasheke

Uyu muyobozi w’ibitaro bya Ruri yabwiye abanyamakuru ko yasanze ibitaro bya Kibogora bifite umwihariko wo kwita ku isuku, gukorera hamwe no kwita ku barwayi kandi muri byose. Ibi ngo bakaba babifashe nk’amasomo bazifashisha mu kuzamura ireme ry’ubuvuzi aho bakorera.

Umuyobozi w’Ibitaro bya Kibogora, Dr Nsabimana Damien yavuze ko kwakira inama nk’iyi ari ishema batewe n’uko minisiteri y’Ubuzima iha agaciro ibikorwa byiza na serivise zishimirwa kuri ibi bitaro.

Dr Nsabimana avuga ko ibanga ryo kugera ku isuku y’indashyikirwa ndetse na serivise nziza zihatangirwa kandi zigashimwa n’abazihabwa bituruka ku bakozi bakunda umurimo kandi bawutojwe, ndetse bakaba banezezwa no kubona umusaruro mwiza mu byo bakora. Uyu muco ngo washyizwe mu bakora muri ibi bitaro kuva byatangira ukagenda ukwirakwira no mu baza kuhakorera nyuma.

Dr Nsabimana Damien uyobora ibitaro bya Kibogora asobanurira abayobozi b’ibitaro bagenzi be uko bita ku isuku na serivise nziza kandi bigashoboka.

Zimwe mu nyubako z’ibitaro bya Kibogora ni izo mu mwaka wa 1942 ariko icyo gihe bikaba byari bikiri ivuriro kuko byabaye ibitaro mu 1968 bitangijwe na nyakwigendera Dr Albert Snyder. Kuva icyo gihe kugeza ubu, ibi bitaro byo mu karere ka Nyamasheke bizwiho gutanga serivise nziza zishobora no kuba isomo ku bindi bitaro bituranye.

Ibi bitaro bishingiye ku idini ya Méthodiste Libre mu Rwanda bifite intero igira iti “Dukorera Imana ikiza kandi igatanga ubugingo”.

Emmanuel Ntivuguruzwa