Mu bisigaratongo bikihaboneka harimo ibiti by’imivumu biri hafi yaho, ndetse n’amabuye yarenzweho n’ibyatsi by’umukenke yari yubatsweho inzu z’abaturage n’ishuri ribanza ryitwaga Ecole Primaire Nyirarukobwa.

Inshuti z’Umuryango witwa "Nyirarukobwa Family" washinzwe n’abari abaturanyi b’imiryango yazimye ndetse n’abigaga muri iryo shuri, bibukiye muri ibyo bihuru kuri uyu wa Gatandatu tariki 20 Mata 2024.

Umuyobozi wa Nyirarukobwa Family, Godance Karemera wari atuye haruguru y’ishuri ryakorewe Jenoside, avuga ko bahungiye ku musozi witwa Kayumba, izari ingabo za Leta (Ex FAR) zikabasukamo amasasu ku itariki 11 Mata 1994.

Abayobozi mu Karere ka Bugesera bifatanyije n’Umuryango Nyirarukobwa Family mu Kwibuka ishuri n’imiryango yazimye

Karemera avuga ko abatarapfuye ako kanya bahise bahunga batatanira hirya no hino, ku buryo ngo hari imiryango yahungaga abayigize bari kumwe bose, bakwicwa hakabura n’umwe urokoka wo kubara inkuru.

Karemera ari mu bakomeje gusaba ko ikibaya cya Nyirarukobwa cyashyirwamo urwibutso rw’amateka yaho.

Ati "Byadufasha ko no mu gihe kizaza, ubwo tuzaba tutakiriho, uzanyura aha wese yazavuga ngo ’aha hahoze abantu, hakorewe Jenoside’, amateka ntabwo yasibangana iyo ahantu hari ikimenyetso."

Bamwe mu banyeshuri biga mu ishuri ryafashe izina Nyirarukobwa ry’iryasenywe na Jenoside

Umuyobozi wa Ibuka mu Karere ka Bugesera, Chantal Bankundiye, avuga ko mu bigomba kuba bigize ikimenyetso cya Jenoside yakorewe muri Nyirarukobwa, hatagomba kubura amazina y’abigaga muri iryo shuri, abarezi n’imiryango yazimye.

Uwitwa Jean Claude Barigira warokokeye muri Nyirarukobwa, avuga ko abari bahatuye bibukirwa ku gushyira hamwe kwabo kuko bari bahuje amateka, bikaba byabera urugero abarimo kubyiruka muri iki gihe.

Umuyobozi w’Akarere ka Bugesera, Richard Mutabazi, avuga ko ubusabe bwa Ibuka bw’uko muri Nyirarukobwa hashyirwa ikimenyetso, bwagejejwe ku nzego zibishinzwe, kandi ko zirimo gutanga icyizere.

Amafoto ya bamwe mu biciwe muri Nyirarukobwa

Ati "Byarumvikanye ku ikubitiro, ubu hakurikiyeho kwegera inzego bireba, tukemeranya ku nyigo, icyo byasaba, impushya n’ibindi, turizera ko igihe bizaba bimaze kwemezwa tuzongera guhuza imbaraga nk’uko twazihuje none, twese icyo kimenyetso tukacyubaka."

Mu rwego rwo kugira ngo Ishuri ribanza rya Nyirarukobwa ritazima, haruguru yaho muri Kanzenze ahitwa ku Ninda, hongeye gushyirwa iryitwa gutyo n’ubwo ritari muri ako gace.

Hasigaye amatongo

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2468 )