Iki kibazo cy’ibura ryamazi ngo cyageze no ku kigo nderabuzima cya Nkombo bamaze iminsi ine badafite amazi yo gukoresha kuburyo ngo bari kubura nayo guha abarwayi ngo banyweshe imiti.

Nk’uko tubitangarizwa n’umuyobozi w’ikigo nderabuzima cya Nkombo, Mukeshimana Didas, ngo bagize Imana akavura karangwa ubu ngo bakaba bari bari kwifashisha utuzi iyo mvura yabasigiye ariko nayo ngo ntaba yujuje ubuziranenge cyane cyane mu kuyakoresha baha abarwayi.

Kubera icyo kibazo bavuga ko kitoroshye na gato, indwara z’impiswi ziterwa n’inzoka zo munda ziri kwiyongera; nk’uko byemezwa n’umuyobozi w’icyo kigo nderabuzima.

Kugeza ubu ku kigo nderabuzima bari kwifashisha abaturage bakajya kubazanira amazi mu murenge wa Nkanka uri ku birometero bitanu uvuye ku umurenge wa Nkombo, bavomesheje amajerekani kandi bakagenda n’amaguru kubera ko nta modoka bagira.

Haba ku ruhande rw’ikigo nderabuzima haba no ku ruhande rw’abaturage barasaba ubuyobozi bw’akarere kubagoboka bakareba icyakorwa hataravuka ibyorezo bikomeye.

Musabwa Euphrem