Umukobwa we w’imfura ufite imyaka 11 y’amavuko niwe wabanje kurumwa niyo mbwa maze mu minsi mike atangira kugaragaza ibimenyetso nk’iby’inyamaswa aho yatozaga udusimba umunwa akaturya agacira inkonda akamoka ndetse hiyongereyeho no gusuka amarira.

Izi ngaruka kugira ngo zigere kuri uyu mwana we ngo byatewe n’ubushobozi buke bagize bituma batinda kumugeza kwa muganga ngo aterwe inkingo ku gihe zo kumurinda kugaragaza ibyo bimenyetso bidasanzwe.

Mu gihe uyu mwana w’umukobwa yari ataramara gufata inkingo zose yandikiwe yarumye nyina ndetse n’abandi bana batatu bavukana akabacira amacandwe afite ubwo bumara maze bose bagahita bajyanwa mu bitaro bya Nyanza ariho umunyamakuru wa Kigali Today yabasanze tariki 20/12/2013.

Mukagwakwaya Jeanne we n’abana be bane barwariye mu bitaro bya Nyanza kubera ingaruka zo kurumwa n’imbwa.

Mukagakwaya Jeanne nyina w’abo bana avuga ko we n’abana be bane bose bari guhabwa inkingo ngo kuko umwana we w’imfura yamurumye ndetse agacira amacandwe n’abandi bana bato bavukana bose bagafatwa.

Ati: “ Ubu urugo rwacu rwarafunzwe tuza mu bitaro bya Nyanza badushyira ahantu hacu wa twenyine mu gihe tugikomeje gukurikiranwa n’abaganga ngo natwe bitazatuviramo ingaruka zikomeye”.

Abazwa uburyo bitaweho muri ibyo bitaro bya Nyanza Mukagakwaya yasubije ko buri wese ari guhabwa inkingo ngo bitandukanye n’uko mbere byari bimeze ubwo umwana we w’imfura yaramaze iminsi arumwe n’iyo mbwa.

Ngo ubu ikibazo cy’ingutu bafite kandi kibakomereye ni icyo kubona ibibatunga ngo kuko mu murenge wa Muyira baje baturukamo ari kure y’ibitaro bya Nyanza hagati aho basaba ko baramutse babonye ibibatunga mu gihe bagihabwa izo nkingo byaba bibaruhuriye umutwaro w’ibyo bibazo bafite.

Umurenge wa Muyira mu karere ka Nyanza uyu mubyeyi n’abana be bane bakomokamo niwo ukomeje kubishingira mu buvuzi barimo guhabwa mu bitaro bya Nyanza.

Jean Pierre Twizeyeyezu