Ubwo hizihizwaga isabukuru y’imyaka 10 Urugaga RRP+ rumaze rushinzwe kuri uyu wa 12/6/2014, Mme Jeannette Kagame yavuze ko umubare w’ababana n’ubwandu bwa SIDA mu Rwanda urenga ibihumbi 300, wibutsa abantu kutirara no gutinyuka kwipimisha ku bushake, hagamijwe guca ubwandu bushya.

Mme Jeannette Kagame ati: “Buri minota itatu haba hari umuntu wanduye virusi itera SIDA mu Rwanda, ntitugomba kwirara (SIDA) iturimo, turugarijwe; ibi biratwereka ko dufite urugendo rurerure, nkaba mbasaba (RRP+) gukomeza gufatanya na Leta mu kurinda abandi, haba mu rubyiruko cyangwa abagore babyarira mu bwandu”.

Mme Jeannette Kagame n’abayobozi batandukanye, mu kwizihiza isabukuru y’imyaka 10 ya RRP+.

Madamu wa Perezida wa Repubulika yifatanyije na RRP+ kwishimira ko mu myaka 10 urugaga rumaze, ababana n’ubwandu bwa SIDA bafashijwe na Leta gukuraho akato bahabwaga, kandi ko babonye imiti igabanya ubukana “abantu bagiye gushira, ibitaro byuzuye indembe, mu ngo nyinshi hari impfubyi”.

Nk’uko umwe mu bagize urugaga RRP+ umaranye ubwandu imyaka 20, Assoumpta Kampororo yabitanzeho ubuhamya, ngo kubona imiti byabaye nko kubonekerwa, ubu ababana n’ubwandu bwa SIDA ngo bashoboye gufatanya n’abandi mu iterambere ry’igihugu kandi mu buryo burambye.

Nyamara ngo ibigo by’imari n’iby’ubwishingizi ngo bibabona “nk’abagiye gupfa” bikabima inguzanyo yo kugira imishinga bakora, nk’uko Umuyobozi wa RRP+, Kagoyire Beatrice yasabye Mme Jeannette Kagame n’abandi bayobozi bakuru b’igihugu, gukora ibishoboka kugira ngo Leta igenere ababana n’ubwandu bwa SIDA ingengo y’imari ihagije.

Bamwe mu bahagarariye amashyirahamwe y’ababana na virusi itera SIDA mu isabukuru ya RRP+.

Ishami ry’umuryango w’Abibumye rishinzwe kurwanya SIDA (UNAIDS) mu ijwi ry’Umuyobozi waryo ushinzwe agace k’Afurika y’uburasirazuba n’amajyepfo, Prof. Sheila Dinotshe Tlou; rishimira u Rwanda kuba ruri mu bihugu bya mbere muri Afurika bifite ingamba zihamye zo kurwanya SIDA, aho ngo 94% by’abagomba gufata imiti bayihabwa.

Prof. Sheila Dinotshe yamenyesheje Urugaga nyarwandda rw’ababana na virusi itera SIDA ko UNAIDS yiyemeje gukumira ubwandu bushya, akato hamwe n’impfu zifitanye isano na SIDA ku kigero cya zero ku ijana mu myaka itanu iri imbere, akaba ashima kwishyira hamwe kw’abana n’ubwandu bwa SIDA mu Rwanda.

Mu myaka 10 Urugaga RRP+ rumaze rushinzwe, ngo ruracyashishikajwe no gutinyura abataripimisha ku bushake ndetse n’ikibazo cy’umubare munini w’abafite ubwandu b’injijuke batarajya mu ihuriro, nyamara ngo ari bo bafite ibitekerezo bishobora gukomeza urwo rugaga.

Simon Kamuzinzi