Umukozi ushinzwe imikoranire n’itumanaho mu bitaro bya Byumba, Sinzinkayo Simeon, avuga ko umubare munini bakira w’abarwayi benshi baba bafite ikibazo cy’indwara zifata imyanya y’ubuhumekero.

Izo ndwara zifata ubuhumekero harimo umusonga (pneumonie), Agakwega (Bronchite) na Syndrome gripal bakunze kwita grippe ngo ziterwa n’ubukonje bwiganje muri aka Karere kubera kagizwe n’imisozi miremire, ndetse hagahora hagwa imvura nyinshi idakunze guhita.

Zimwe muri izo ndwara zifata imyanya y’ubuhumekero hari izandura mu buryo bworoheje ku buryo uyirwaye bimusaba kwirinda kwegera abandi kugirango atabanduza.

Indwara ya gripe yasobanuye ko ikunze gufata abantu iyo uyirwaye ahuje n’utayirwaye umwuka (guhumekeranaho).

Umusonga wo uterwa n’ubukonje bukabije biturutse kutifubika, kunyagirwa n’imvura nyinshi, ndetse no kudafubika abana dore ko ikunze gufata abana cyane cyane bari munsi y’imyaka 10 y’ubukure.

Umwe mu bari baje kwivuza yatangaje ko afite ikibazo cy’inkorora ndetse n’ibicurane, avuga ko iyo ndwara benshi bayirwaye muri ibi bihe by’imvura.

Inzobere mu kuvura iyo ndwara, Dr Muhairwe Fred, atangaza ko indwara zifata imyanya y’ubuhumekero ari indwara mbi kandi zica iyo umuntu ativuje vuba.

Imwe mu nzira zo kwirinda indwara y’umusonga ni ugukingiza abana bakiri bato, izindi nazo zishobora kwirindwa bafubika abana mu gihe cy’imbeho nyinshi no gufata imiti yose uko yayandikiwe na muganga kuko iyo yongeye kuyirwara ataranyweye imiti neza ya miti yahawe ntabwo byoroha ko yakongera kumuvura agakira neza.

Ernestine Musanabera