Iki cyemezo kije gikurikira urubanza ku ifunga n’ifungura ry’agateganyo rwabaye tariki ya 10/02/2014, aho Ubushinjacyaha ku rwego rw’ibanze rwa Kagano bwabasabiraga ko bafungwa by’agateganyo mu gihe cy’iminsi 30, ariko bikaza kugaragara ko impamvu butanga zidafatika.

Aba bakozi barimo batatu bahoze mu kanama k’amasoko mu mwaka wa 2011 ndetse n’aba-Engineers babiri b’akarere bakurikiranwe ku isoko ryatanzwe mu mwaka wa 2011 ryo gusanura inyubako zitandukanye z’akarere ka Nyamasheke.

Iryo soko ryahawe ikompanyi yitwa ECOMOGEC ku mafaranga y’u Rwanda 27,112,341 ariko yaciye miliyoni 8 ku gika cy’ubwiherero mu gihe ikompanyi bari bahatanye yitwa ACOS yari yaciye amafaranga ibihumbi 150 kuri iki gika cy’ubwiherero (cyakora na we akaza guca amafaranga mbumbe ya 27,636,072).

Umushinjacyaha yashingiraga kuri iki gika cy’ubwiherero maze akavuga ko habayeho guhombya Leta ngo kuko isoko ryahawe uwaciye miliyoni umunani (kuri iki gika) mu gihe hari uwaciyeho ibihumbi 150, maze akavuga ko abagize akanama k’amasoko bakoze icyaha naho ku ba-Engineers akavuga ko ari ibyitso kuko batatanze ibiciro by’icyitegererezo cyangwa ngo batunge agatoki.

Abaregwaga hamwe n’abunganizi babo bagaragaje ko ibyo ubushinjacyaha buvuga nta shingiro bufite kuko ngo nta soko ryo gusana ubwiherero ryigeze ritangwa ahubwo ko hatanzwe isoko ryo gusana inyubako zitandukanye z’akarere ka Nyamasheke kandi rikaba ryarahawe ikompanyi yatanze ibiciro mbumbe bito nk’uko biteganywa n’amategeko.

Mu isomwa ry’uru rubanza ku ifunga n’ifungurwa ry’agateganyo, Umucamanza yagaragaje ko nta mpamvu zumvikana Umushinjacyaha yatanze zatuma aba bakozi b’akarere ka Nyamasheke bakekwaho iki cyaha kuko ngo isoko baritanze mu buryo bukurikije amategeko, isoko rigahabwa ikompanyi yatanze ibiciro mbumbe bito kandi kikaba kizira gucagaguramo isoko ibice, nk’uko bihanwa n’itegeko.

Mu isomwa ry’uru rubanza, Umucamanza yavuze ko nubwo ACOS yari yaciye amafaranga ibihumbi 150 ku bwiherero, ECOMOGEC ikabucaho miliyoni 8, ngo byagaragaye ko ACOS ari yo yari yatanze igiciro mbumbe kiri hejuru (asaga ibihumbi 523 hejuru y’uwahawe isoko).

Umucamanza kandi yagaragaje ko kuba Ubushinjacyaha butaragaragaje igiciro nyacyo cyagombaga gutangwaho isoko ahubwo bukavuga ko nta wari kurihabwa ndetse bukavuga ko habayemo ibyaha bitatuma aba bakozi b’akarere ka Nyamasheke bakekwaho iki cyaha mu gihe nta bimenyetso bifatika bibigaragaza.

Ku bijyanye n’abakozi 3 babaga mu kanama k’amasoko, Umucamanza yavuze ko nta mpamvu zifatika zatanzwe n’ubushinjacyaha zatuma bakekwaho icyaha cyo gutanga ku busa cyangwa ku giciro kidakwiye ibintu bya leta, maze ku ba-Engineers b’akarere avuga ko na bo nta mpamvu zo kubakeka kuko n’abo ubushinjacyaha bwavuze ko baberewe ibyitso, nta bimenyetso byatuma bakekwaho icyaha.

Ku byari byasabwe n’ubushinjacyaha by’uko aba bakozi bafungwa by’agateganyo, umucamanza yavuze ko mu busesenguzi bw’urukiko, rwasanze nta mpamvu zifatika zatuma bakekwaho icyaha, bityo hakaba nta n’impamvu zikomeye zatuma bafungwa by’agateganyo kuko ngo “ukurikiranyweho icyaha ntashobora gufungwa mbere y’urubanza keretse iyo hari impamvu zikomeye kandi icyaha akurikiranyweho kikaba gihanishwa byibura imyaka ibiri y’igifungo.”

Ku bw’izi mpamvu, Urukiko rw’Ibanze rwa Kagano rwategetse ko bafungurwa by’agateganyo, bagakurikiranwa bari hanze.

Aba bakozi batanu b’akarere ka Nyamasheke batawe muri yombi tariki ya 30/01/2014. Kuva icyo gihe, bakaba bari bafungiye kuri Station ya Polisi ya Ruharambuga mu karere ka Nyamasheke.

Icyaha ubushinjacyaha bukurikiranyeho aba bakozi b’akarere ka Nyamasheke ni icyo “gutanga ku busa cyangwa ku giciro kidakwiye ibintu bya Leta” giteganywa kandi kigahanwa n’ingingo ya 643 yo mu gitabo cy’Amategeko Ahana mu Rwanda. Uwo gihamye, ahanishwa igifungo kuva ku mezi 6 kugeza ku myaka 2 n’ihazabu yikubye kuva ku nshuro 2 kugeza ku 10 z’ibyatanzwe.

Emmanuel Ntivuguruzwa