Mazimpaka ufungiye kuri gereza nkuru ya Kigali izwi ku izina rya 1930, avuga ko mu gihe yari akiri umupolisi yariye ruswa atabara ndetse ko hari abantu benshi barimo n’abo bafunganye yagiye yimisha serivisi abandi bakanafungwa bimuturutseho.

Uyu mugabo uri mu kigero cy’imyaka 35, asigaje imyaka itatu ngo arangize igifungo cye, yemeza ko amakosa yakoze yatumye ubuzima bwe buhinduka ukundi, nk’uko yabitanzemo ubuhamya ubwo urwego rw’ubutabera rwatangaga ibiganiro byo kwirinda ruswa kuri uyu wa Kabiri tariki 11/2/2014.

Yagize ati "Bagenzi banjye nababwira ko icyaha cya ruswa ari kibi, icyaha cya ruswa kimunga ubukungu bw’igihugu, gifite ingaruka nyinshi mu ngo (...) aha ngaha nkatiwe imyaka itanu ariko niba muri iyo myaka itanu mu rugo bangemurira ndimo kubahombya."

Mazimpaka atanga ubuhamya bwe bw’uko yakaga ruswa abamuganaga ariko kuri ubu aricuza.

Yatangaje ko naramuka afunguwe kimwe na bagenzi be bafungiye icyo cyaha bateganya kujya gusaba imbabazi ubuyobozi bukuru bwa Polisi, kubera amakosa bakoze bahesha isura mbi umwuga w’igipolisi.
Mazimpaka yatangaje ko muri gereza bamaze gushinga "Club Anti corruption" yo kurwanya ruswa, aho bakomeza gushishikariza bagenzi babo kwamagana ruswa.

Ibi byashimangiwe na Charles Kariwabo, Perezida w’Urukiko rukuru, wavuze ko ruswa igirira nabi uyihawe idasize n’uyihawe. Yavuze ko aba bagororwa bafite amahirwe y’uko bahawe igihe cyo kwisubiraho ko kandi ko hanze hakiri abandi bakidegembya.

Ati "Hanze hashobora kuba hariyo ba ruharwa barenze abari aha, mwebwe mukaba mufite n’amahirwe yo gutekereza mu mibereho yanyu yo kwisuzuma, ukavuga uti narakosheje ariko ukagira n’umwanya wo guhindura amateka."

Ibi biganiro byatanzwe muri gahunda yahariwe icyumweru cyashyiriweho kurwanya ruswa mu butabera, ahakomeje kugenda hatangwa ibiganiro byamagana ruswa ahantu hatandukanye mu gihugu. Muri gereza nkuru ya Kigali hafungiwemo abantu 31 bakatiwe kubera icyaha cya ruswa.

Emmanuel N. Hitimana