Iyo mirongo ngenderwaho ngo izanafasha inkiko kujya zitegeka kwishyura indishyi, mu gihe uwangirijwe yaba yatewe ubusembwa ku mubiri we cyangwa hari igice cy’umubiri cyangiritse, kandi cyatumaga akora umurimo umubeshaho ariko ntibishoboke ko awukomeza; nk’uko byatangajwe n’Umugenzuzi Mukuru w’inkiko, Francois Regis Rukundakuvuga.

“Turafata icyemezo dusa n’abahuriyeho kuko amategeko adasobanura buri kabazo; turibaza ngo niba uri umu-star, isura yawe iyo yangijwe (wagize impanuka), ntabwo ihenda kimwe n’uwirirwa ahinga, niba akaguru wakinishaga umupira kavunitse; ntiwishyurwa bisanzwe ahubwo urishyurwa nk’uwavunitse akaguru kari kagutunze”, Rukundakuvuga.

Yongeyeho ko abacamanza bose mu gihugu bagomba kujya bategeka abantu kwishyura ibingana aho baba hose mu gihugu; kandi hakabanza gusuzumwa ubukana bw’ikosa ryakozwe, imiterere y’uwarikoze n’icyari kigenderewe mu kurikora.

Rukundakuvuga yahakanye ko ibijyanye no gushyira mu gaciro bitazateza abacamanza kugira amarangamutima yo kurenganya ababurana bamwe no kubogamira ku bandi; aho asobanura ko ubusanzwe amategeko ari rusange, umucamanza ahanini akaba akunze gushyira mu gaciro ashingiye ku bunyangamugayo.

Umucamanza w’umwongereza, Nic Madge wahaye amahugurwa abacamanza ku buryo rusange bwo gushyira mu gaciro mu gihe bategeka kwishyura indishyi z’ibyangijwe, yavuze ko ubu buryo busanzwe bukoreshwa mu bihugu bitandukanye byo ku isi, hadashingiwe gusa kubyo amategeko asobanura.

Simon Kamuzinzi