Nyiraneza Clotilde, umuyobozi wungirije ushinzwe imiberehomyiza y’abaturage mu karere ka Ngororero ari nawe uyoboye iryo tsinda, avuga ko nubwo icyari intego nyamukuru ari ukumenya imibereho n’amikoro y’imiryango y’abo banyeshuli, izo ngendo zanabaye igihe cyo gukangurira ababyeyi kumenya ko amashuri y’abana babo aribo areba bwa mbere Leta ikaza ibunganira.

Agira ati “iyo ababyeyi baza guteganyiriza abana babo kandi bakabyara abahuje n’ubushobozi bafite ntabwo abana baba bicaye abandi bari mu masomo. Kubyara si inshingano z’umubyeyi ngo kurera bibe inshingano za Leta ahubwo Leta yunganira umuturage”.

Nubwo byagiye bigaragara ko ababyeyi bamwe bafata amashuri ya Kaminuza nk’agomba kwishingirwa na Leta, abagize itsinda babagaragarije ko igihe umwana akiga ndetse atarahabwa umunani kandi ari uko awusabye, ababyeyi baba bafite inshingano zo kumwishyurira amashuri.

Nubwo abenshi mu babyeyi bakigaragaza ko bahangayikishijwe n’uko abana babo bashobora gucikiriza amashuri igihe Leta izaba itemeye kubafasha, banemera ko barangaye kuko kwishyura amashuri y’abana babo bakagombye kuba aribo bireba.

Muri icyo gikorwa, ikindi cyagaragaye ni uko bamwe mu batumiwe muri izo nama bagiye batanga amakuru atari ukuri bagamije kubogamira ku miryango imwe n’imwe y’abanyeshuri, nyamara abagize itsinda bajya muri iyo miryango bagasanga amakuru yatanzwe atari ukuri.

Ernest kalinganire