Ibi barabisabwa nyuma y’uko minisiteri y’uburezi yashyizeho amabwiriza asaba guca izi mbaho ubundi zari zisanzwe zifashishwa mu mashuri abanza cyane cyane mu duce tw’icyaro.

Minisiteri y’uburezi yemeje ko izo mbaho zifashishwaga mu kwiga no kwandika bidafasha abana mu kubika ibyo bize no gusubiramo amasomo yabo, kuko ibyo banditse bihita bisibama. Kuri ibi haniyongeraho ko ibikoresho nk’amatushi akoreshwa mu kwandika ndetse no kubona izo mbaho bitoroshye.

Umuyobozi w’uburezi mu karere ka Ngororero, Musabyingabire Petronille, asaba abayobozi b’ibigo by’amashuri guca burundu ikoreshwa ry’imbaho kuko zikigaragara henshi muri aka karere. Hari ababyeyi bavuga ko bafite impungenge zo kubona amakayi n’amakaramu kubera ubukene, bikaba bishobora kuba imbogamizi kuri iyi gahunda.

Mukamana Emmanuelie, umubyeyi w’abana 3 bose biga mu mashuli abanza, avuga ko asanzwe azi ko kwigira ku rubaho bidafasha abana be ariko akaba adafite amikoro yo kubagurira amakayi kuko ngo abarezi batuma abana amakayi menshi mu gihe ukoresha urubaho yakoreshaga rumwe gusa ku masomo yose.

Umuyobozi w’uburezi mu karere ka Ngororero avuga ko mu mashuri abanza hadakenerwa amakayi menshi ndetse akaba adahenda, gusa hakaba hakenewe kubyumvisha ababyeyi akaba ari nabwo buryo abayobozi b’ibigo bazifashisha mu guca imbaho ku buryo bwumvikanyweho n’ababyeyi.

Ernest Kalinganire