Insanganyamatsiko urubyiruko rwitabira siporo rwiga rwari rwihaye, yari kurwanya ikoreshwa ry’ ibiyobyabwenge mu rubyiruko rw’abanyeshuri.

Inzego zitandukanye z’uburezi muri aka karere zivuga ko ikoreshwa ry’ ibiyobyabwenge mu mashuri ryagabanutse nyuma yahoo bigiriye muri iyi nsanganyamatsiko, kuko ubu bitakigaragramo.

Mu itangizwa ry’imikino mu mashuri ku rwego rw’akarere ka Ngoma, kuri uyu wa Gatanu tariki 02/03/2013, Zaina Kayitesi, uhagarariye Ishyirahamwe ry’imikino mu mashuri mu Rwanda, yavuze ko nyuma yuko bihaye intego yo kurwanya ibiyobyabwenge mu mashuri mu mwaka ushize, byagize umusaruro ufatika kuko ubu bitakigaragaramo cyane nkambere.

Ygize ati: “Kwiha intego binyuze mu nsanganyatsiko tugenderaho umwaka wose bituma bitanga umusaruro kuko usanga mu marushanwa abaho hatangirwamo ubutumwa buhora bubibutsa icyo bagomba gukora.mubyukuri kugia insanganyatsiko biduha umusaruro”.

Bamwe mubanyeshuri nabo bemeza ko umuvuduko ibiyobyabwenge byari biriho mu mashuri wagabanutse, ubu bitakigaragara. Ku bwabo ngo biterwa n’uko hagiyeho ingamba zo guhora abantu bibutswa kubirwanya yaba mu mikino nahandi.

Umunyeshuri wari witabiriye ibi birori yagize ati: “Hari bamwe mu bakinnyi wasangaga babinwa, kubera kubyibutswa buri uko bagiye gukina byatumye bamwe babireka kubera uku guhora bumva ubutumwa nkubu bugaragaza n’ibihano kuwabinyeye”.

Kuba ikoreshwa ry’ibiyobyabwenge ryaragabanutse mu bigo by’amashuri yo mukarere ka Ngoma byemezwa kandi na Mbonyumukura Emmanel, umukozi mu karere ka Ngoma wungirije ushinzwe uburezi, aho yavuze ko kwiha intego ari byiza kandi ko bitanga umusaruro mwiza iyo bikurikiranwe.

Insanganyamatsiko y’uyu mwaka mu mikino yo mu mashuri ni ”Tugire umuco w’ubutwari duharanira kwigira”.

Gutambutsa ubutumwa bwamagana ikintu runaka mbere ya buri mukino, bishobora guhindura byinshi, kuko bituma bihora mu mitwe y’abantu bityo bakabyitwararika kandi n’inzego bireba bigatuma zihora zibikurikirana.

Jean Claude Gakwaya