Bamwe mu batahutse bacumbikiwe mu murenge wa Rukara wo mu karere ka Kayonza nyuma yo gusanga nta miryango bafite bahita bajyamo kuko bari bamaze igihe kinini baba muri Tanzaniya.

Umunyamabanga nshingwabikorwa w’umurenge wa Rukara, Ntirenganya Gervais, avuga ko ubu bari kubarura abo bacumbikiwe i Rukara, kugira ngo hamenyekane icyo buri wese yakoraga muri Tanzaniya.

Ku birebana n’abana bakiri bato bahoze biga muri Tanzaniya, umunyamabanga nshingwabikorwa w’umurenge wa Rukara yavuze ko bari kuvugana n’inzego zibishinzwe kugira ngo harebwe uko basubizwa mu mashuri ya Leta mu Rwanda ntibazadindire.

Nta mubare ntakuka w’abana bagomba gusubizwa mu ishuri uramenyekana kuko kugeza ubu hari abandi Banyarwanda bagitaha kugeza ubu.

Mu mpera z’icyumweru gishize mu murenge wa Rukara habarurwaga Abanyarwanda barenga gato 120 batahutse bakaba nta miryango bari basanzwe bafite kuko bari baragiye muri Tanzaniya kera.

Kuri abo hiyongeraho abandi amagana bo mu karere ka Kayonza batashye bagahita bakirwa n’imiryango ya bo.

Kugeza ubu harabarurwa Abanyarwanda bagera ku 7000 bamaze kugera mu Rwanda nyuma yo kwirukanwa muri Tanzaniya. Uretse abana bateshejwe amashuri, haranarebwa uburyo n’abadafite imiryango bazatuzwa.

Cyprien M. Ngendahimana