Ibi biremezwa n’umuyobozi wungirije ushinzwe imari n’iterambere ry’ubukungu mu Karere ka Kamonyi, Uwineza Claudine, uvuga ko nta kigo cy’amashuri abanza na kimwe abana barya abandi ngo bicire isazi mu maso.

Yemeza ibi yagize ati “Ibigo byose byo mu Karere ka Kamonyi abana barya saa sita ikigero tugezeho ni 100% niba hari umuyobozi w’ishuri ubihakana yaba abeshye”.

Akomeza agira ati “Ababyeyi badafite amafaranga yo kwishyurira abana babo igaburo rya saa sita ku ishuri batanga imibyizi bagahinga ibyo barya mu cyimbo cyo gutanga amafaranga kandi hose ibi bintu byarashobotse mu Karere ka Kamonyi”.

Imibare ituruka muri Minisiteri y’uburezi mu Rwanda yerekana ko mu mwaka w’amashuri ushize wa 2014 abana bagaburirwaga saa sita mu mashuri yo mu Karere ka Kamonyi bari ku gipimo cya 74,3%, ariko ngo iyo mibare mu mwaka w’amashuri wa 2015 yarazamutse bagera ku 100%, nk’uko Uwineza abivuga.

Umuyobozi w’Intara y’Amajyepfo, Alphonse Munyantwari yishimiye ibi bipimo Akarere ka Kamonyi kagezeho muri gahunda yo kugaburira abana ku ishuri avuga ko n’utundi turere two muri iyi Ntara twabigiraho uko babigeza bakahakorera ingendoshuri.

Munyantwari akomeza agira inama n’utundi turere gushyira ingufu muri iyi gahunda ngo kuko aho ishinze imizi ifasha abana mu myigire yabo ndetse ikanabasabanya.

Ariko akomeza asaba ko aho itarabasha gukorwa ku gipimo gishimishije kiri hejuru ya 80% bakomeza ubukangurambaga mu babyeyi kugira ngo bumve neza akamaro kayo.

Mu Karere ka Kamonyi habarizwa ibigo 42 by’amashuri byigwamo n’abana 13048 nk’uko imibare yari ifitwe na Minisiteri y’uburezi mu Rwanda mu mwaka w’amashuri wa 2014 ibigaragaza.

Jean Pierre Twizeyeyezu