Mu muhango wo gutangiza itorero mu mashuri ku rwego rw’igihugu wabereye mu ishuri rya SOS Nyamirama mu karere ka Kayonza tariki 20/02/2014, Minisitiri Harebamungu yavuze ko abashenye u Rwanda babanje kwigisha amateka mabi no guca indangagaciro n’Ubunyarwanda bahereye mu mashuri, kandi abigishijwe icyo gihe bakaba ari na bo baje gutegura Jenoside yakorewe Abatutsi mu 1994.

Minisitiri Harebamungu yavuze ko kugira ngo Ubunyarwanda bugaruke hakwiye gushyirwa imbaraga mu kwigisha urubyiruko ariko imbaraga nyinshi zigashyirwa mu mashuri.

Minisitiri Harebamungu yishimana n’abanyeshuri mu muhango wo gutangiza itorero mu ishuri rya SOS Nyamirama mu karere ka Kayonza.

Ati «Kugira ngo twubake Ubunyarwanda, dusane igihugu cyacu tunagarure indangaciro nyarwanda tugomba guhera ku bana bacu. Imbaraga byatwaye igihugu cyacu gisenyuka tugomba gushyiramo nyinshi cyane kurushaho kugira ngo dushobore kucyubaka. Nta musingi wundi rero ni mu bana bacu ni mu rubyiruko cyane cyane duhereye mu mashuri ».

Yasabye ababyeyi n’abarezi kwita ku burere bw’abana kandi bakamenya ko Ubunyarwanda ari bwo shingiro rya byose, by’umwihariko yasabye ababyeyi gutoza abana imico myiza bakabarinda ibivumbikisho byo ku mashyiga bisenya igihugu n’Ubunyarwanda bakamenya ko umwana ari uw’igihugu ukwiye kurerwa neza mu rwego rwo gutegura igihugu cyiza.

Abana biga mu ishuri rya SOS Nyamirama bavuga ko itorero rifitiye u Rwanda n’Abanyarwanda akamaro kanini cyane kuko rihuza Abanyarwanda abatiyumvanagamo bakongera bakabana nk’uko byavuzwe na Niyonsenga Gervais wiga mu mwaka wa gatandatu.

Kangabe Moreen asanga itorero rihuza Abanyarwanda kandi rigatuma bagira umuco w’ubutore.

Ishema Gad wiga mu mwaka wa gatatu we avuga ko n’ibindi bigo by’amashuri bigisinziriye mu bijyanye n’itorero bikwiye gukora cyane bigafatanya n’abandi kubaka igihugu. Itorero ngo rifasha abana kwiyubaka kandi bakagira umuco w’ubutore nk’uko Kangabe Moreen wiga mu mwaka wa gatandatu abivuga.

Umuyobozi wa komisiyo y’igihugu y’itorero ry’igihugu, Rucagu Boniface, yavuze ko Leta y’Ubumwe bw’Abanyarwanda ari iyo yonyine mu mateka y’u Rwanda yabashije kongera gutangiza uburere bw’indangagaciro na kirazira mu mashuri yose y’u Rwanda kugira ngo abana b’u Rwanda batozwe gukunda icyiza no kwanga ikibi.

Yavuze ko mu gihe umuco w’indangagaciro na kirazira waba wongeye kujya mu Banyarwanda guhera mu bakiri batoya, u Rwanda ruzongera rugatera imbere kuko ari bo mbaraga z’igihugu cy’ahazaza.

Rucagu avuga ko mu gihe umuco w’indangagaciro na kirazira waba wongeye kujya mu Banyarwanda guhera mu bakiri batoya, u Rwanda ruzongera rugatera imbere.

Harategurwa uburyo gahunda y’itorero yakwinjizwa mu nteganyanyigisho yigishwa mu mashuri abanza b’ayisumbuye nk’uko Dr. Harebamungu yabivuze. Yavuze ko minisiteri y’uburezi iri gukorana na komisiyo y’igihugu y’itorero kugira ngo indangagaciro zose zizinjizwe mu nteganyanyigisho kandi abana bakajya biga baganira uburyo bakubaka igihugu.

Cyprien M. Ngendahimana