Iyi nkoranyamagambo ndetse na nkoranyabimenyetso, ngo iri gutegurwa n’urwego rw’igihugu rw’abafite ubumuga, bafatanyije n’umuryango w’abongereza witwa VSO, izafasha mu gutuma abantu benshi babasha kumva igisobanuro cy’ibimenyetso byifashishwa n’abatavuga, ndetse babashe no kuba babasemurira.

Gaston Rusiha ati “hamwe n’urwego rw’igihugu rw’uburezi (REB), twatangiye kureba uko amarenga yakwigishwa mu mashuri. Ubundi abakora umurimo wo gusobanurira abatumva, ahandi babyiga mu ishuri ariko ntibiteganyijwe mu nyigisho zo mu Rwanda.”

Mu rurimi rw’abatumva buri nyuguti ifite ikimenyetso cyayo.

Gaston na none ati “Igihe tuzaba dufite abantu bazi gukoresha amarenga, bizoroha kubona ababasha gusobanurira abatumva igihe hari ibiri kuvugwa na bo bakeneye kumenya.”

Ikindi, ngo ururimi rujyana n’umuco w’ahantu. Uko basemurira abatumva mu bindi bihugu si ko babasobanurira mu Kinyarwanda. Ngo ni na yo mpamvu ubu kuri televiziyo y’u Rwanda hari usemura amakuru y’ikinyarwanda, nyamara ntihabe usemura ay’icyongereza n’ay’igifaransa.

Gaston ati “urebye televiziyo y’u Rwanda, wagira ngo abatumva ntibemerewe kumenya ibiri kuvugwa mu makuru y’igifaransa n’ay’icyongereza. Icyakora, no kuba hari usemura mu Kinyarwanda ni intambwe. N’ibindi bizagenda biza buhoro buhoro.”

Marie Claire Joyeuse