Ibi bikaba byavuzwe kuri uyu wa gatanu tariki 24/1/2014, mu gikorwa cyo gutaha k’umugaragaro uru ruzitiro ndetse n’ikibuga cyizajya gikinirwaho Basket na Volley ball, byose bikaba byaruzuye bitwaye amadolari ibihumbi 25 yatanzwe ku nkunga y’umushinga w’abanyakoreya KOICA.

Uwamariya Beatrice, umuyobozi w’ishuri Nyamagumba Primary School, avugako banejejwe no kuba abanyeshuri babo babonye ikibatandukanya n’umuhanda Musanze – Nyakinama, kuko ngo bahoranaga impungenge z’impanuka.

Ati: “Ikigo cyubatse k’umuhanda. Byashobokaga ko umupira utakara mu muhanda umwana akawusangayo, bikaba byaduteza ibyago. Kugeza ubu twari tumaze kugira impanuka zigera kuri ebyiri.”

Iri shuri riri mu maboko ya kiriziya gatorika,kuva mu myaka ya za 1930 ubwo ryashingwaga, cyane ko ari naryo shuri ribanza rya mbere ryubatswe mu karere ka Musanze, kuri ubu rifite abanyeshuri barenga 1.100.

Padiri Florien Nikwigize, ushinzwe uburezi muri katederari gatorika ya Ruhengeri, yavuze ko nka kiriziya bashima ubu bufatanye, cyane ko umwana wakinnye aba ari umwana ukurikira kandi ubasha gutsinda mu ishuri.

Ati: “Abana iyo bakinnye bakidagadura, bibaha n’umwanya utuma barushaho kwiga neza kandi bagatsinda.”

Ushinzwe ibikorwa muri KOICA ishami ry’u Rwanda, avuga ko ubufatanye n’iri shuri bumaze hafi imyaka ibiri, aho baritera inkunga mu bikorwa bitandukanye birimo n’ibitabo abanyeshuri bigira mo ndetse n’inzu y’isomero ryacyo.

Jean Noel Mugabo