Igihugu cya Kenya na cyo ngo kirateganya gutangiza gahunda imeze nka One Laptop per child mu mwaka w’amashuri utaha. Kuba u Rwanda rwaratangije iyo gahunda kandi ikaba igeze ahashimishije ngo ni byo byatumye abo badepite bo muri Kenya baza gukora urugendo shuri mu Rwanda.

Ibyo ngo bizatuma babasha gutanga ibitekerezo by’ukuntu iyo gahunda yakorwa neza igihe izaba itangijwe mu gihugu cya bo, nk’uko byavuzwe na Julius K. Melly, umuyobozi wungirije wa komite y’uburezi mu nteko ishinga amategeko ya Kenya.

Yavuze ko we na bagenzi be batangajwe cyane n’uburyo gahunda ya One laptop per Child yatangijwe mu Rwanda ubu ikaba iri gushinga imizi, by’umwihariko abana bato bagakura bazi ikoranabuhanga.

Ati “Twashimishijwe cyane n’uburyo Leta y’u Rwanda igerageza gushakira abana za mudasobwa, na twe nitugera iwacu tuzicara tuganire na minisiteri y’uburezi kugira ngo umushinga wacu w’umwaka utaha na wo uzagere ku ntego za wo”.

Leta ya Kenya ku ikubitiro ngo izashora amafaranga agera kuri miriyari 15 z’amashiringi akoreshwa muri icyo gihugu, nk’uko Julius K. Melly yakomeje abivuga.

Kugira ngo gahunda ya One Laptop per Child ishoboke mu Rwanda, byatewe ahanini n’uko mu bice byose by’u Rwanda hagenda hashyirwa amashanyarazi. Ibi bitandukanye n’igihugu cya Kenya kigifite ahantu henshi hataragera amashanyarazi.

Cyakora ngo hatangijwe gahunda yo gukwirakwiza amashanyarazi hirya no hino muri icyo gihugu, ku buryo ngo bitazabangamira uwo mushinga wo guha abana za mudasobwa.

Mu Rwanda hamaze gutangwa za mudasobwa zigera ku bihumbi 204 mu mashuri 407 ya Leta hirya no hino mu gihugu, nk’uko bivugwa na Mugabo Patrick ushinzwe gutanga za mudasobwa mu bigo by’amashuri. Hafi muri buri murenge ngo hari ishuri nibura rimwe ryatangijwemo gahunda ya One Laptop per Child.

Mudasobwa zigenerwa abana biga kuva mu mwaka wa kane kugeza mu wagatandatu w’amashuri abanza, ariko ngo uko ubushobozi buzagenda buboneka izo mudasobwa zizongerwa zigere nibura ku bana bose bo mu Rwanda.

Cyprien M. Ngendahimana